يران يسلام رەسپۋبليكاسىنىڭ پرەزيدەنتىمەن كەلىسسوزدەر قورىتىندىسىنا وراي وتكەن ءباسپاسوز ءماسليحاتىندا ەل تاريحى ءۇشىن قۇندى ماتەريالدار ۇسىنىلدى، دەپ حابارلايدى «ادىرنا» ۇلتتىق پورتالى.
پرەزيدەنتتىڭ سوزىنشە، يران دەلەگاتسياسى الىپ كەلگەن 27 كونە قولجازبانىڭ كوشىرمەلەرى 18 عاسىرداعى قازاق تاريحى مەن مادەنيەتىنە ارنالعان.
«قازاق تىلىندە پارسى سوزدەرى كوپ. عالىمدار تىلدىك قورىمىزداعى پارسى سوزدەرىنىڭ ۇلەسى 4 پايىز دەپ سانايدى. ولاردىڭ قاتارىندا استانا، پايدا، كورمە، داۋلەت، ءدارى، دارمەك، اۋلا، ورازا سياقتى سوزدەر بار. بۇگىندە يراننىڭ سولتۇستىگىندەگى گۇلستان پروۆينتسياسىنىڭ گورگان، ءباندار تۇركىمەن جانە كۇمبەد قالالارىندا 5 مىڭنان استام قازاق تۇرادى. ءفيردوۋسيدىڭ “شاحناماسى” مەن ونىڭ كەيىپكەرلەرى تۇران حالىقتارىنا دا جاقىن. قازاقتىڭ ۇلى اقىنى اباي فيردوۋسي، حافەز، ساعدي سياقتى پارسى شايىرلارىنىڭ شىعارمالارىمەن تانىس بولعان»، — دەدى پرەزيدەنت.
مەملەكەت باسشىسى يران ۇسىنعان ماتەريالداردا قازاق حاندىعىنىڭ الەۋمەتتىك-ەكونوميكالىق احۋالى، كورشى ەلدەرمەن قارىم-قاتىناسى، ايماقتاعى باسەكەلەستىك جانە تۇركىستاننىڭ ساياسي-ەكونوميكالىق جاعدايىنا قاتىستى قۇندى دەرەكتەر قامتىلعانىن اتاپ ءوتتى.
«ۇسىنىلعان 27 قولجازبادا قازاق حاندىعىنىڭ الەۋمەتتىك-ەكونوميكالىق احۋالى، كورشى ەلدەرمەن قارىم-قاتىناسى، ايماقتاعى باسەكەلەستىك، تۇركىستان ايماعىنىڭ ساياسي-ەكونوميكالىق جاعدايى، رەسەي پاتشالىعىنىڭ قازاق ايماقتارى مەن حاندىقتارىنا قاتىستى ارەكەتتەرى تۋرالى ساراپتامالار بەرىلگەن. سونداي-اق قازاق دالاسىندا كومىر، تەمىر، مىس، قورعاسىن جانە بيريۋزا كەنىشتەرىنىڭ تابىلىپ، ولاردى ءوندىرۋ جونىندەگى مالىمەتتەر بار. وتە قىزىق دەرەكتەر قامتىلعان. سىزگە كوپ راقمەت، پرەزيدەنت مىرزا»، — دەدى قاسىم-جومارت توقاەۆ يران باسشىسىنا قاراتا.
