«Egemen Qazaqstan» گازەتىندە مەملەكەتتىك كەڭەسشى ەرلان قاريننىڭ قازاقستاننىڭ ىشكى ساياساتىنىڭ جاڭا تۇعىرناماسىنا ارنالعان كەڭ اۋقىمدى ماقالاسى شىقتى، دەپ حابارلايدى "ادىرنا" ۇلتتىق پورتالى.
ماتەريالدا مەملەكەت باسشىسى قاسىم-جومارت توقاەۆ 5 قاراشادا قول قويعان «قازاقستان رەسپۋبليكاسى ىشكى ساياساتىنىڭ نەگىزگى قاعيداتتارى، قۇندىلىقتارى مەن باعىتتارىن بەكىتۋ تۋرالى» جارلىقتىڭ تاريحي ماڭىزى جان-جاقتى تالدانادى.
ەرلان قاريننىڭ ايتۋىنشا، بۇل قۇجات – قازاقستاندا العاش رەت ىشكى ساياساتتى جۇيەلى تۇردە ايقىندايتىن ءبىرتۇتاس يدەولوگيالىق جانە ۇيىمداستىرۋشىلىق اكت. بۇعان دەيىن سالانىڭ ءار كەزەڭدە قابىلدانعان باعدارلامالارى بولعانىمەن، ولاردىڭ اراسىندا بىرىزدىلىك بولماعان جانە كەي تۇستاردا ءبىر-بىرىنە قايشى نورمالار كەزدەسكەن.
مەملەكەتتىك كەڭەسشى قۇجاتتى ازىرلەۋگە تانىمال ساراپشىلار، ۇلتتىق قۇرىلتاي مۇشەلەرى مەن عىلىمي قاۋىمداستىق جارتى جىلدان استام ۋاقىت ەڭبەك ەتكەنىن اتاپ ءوتتى. تۇجىرىمدامادا جالپىۇلتتىق قۇندىلىقتار، جاڭا نىشاندار – شاڭىراق، دومبىرا، ابايدىڭ «قارا سوزدەرى» سەكىلدى ۇلتتىق سيمۆولدار بەكىتىلگەن.
ماقالادا «زاڭ جانە ءتارتىپ» قاعيداتى، «تازا قازاقستان» جوباسى، مەكتەپتەگى «ادال ازامات» باعدارلاماسى، ەڭبەكقورلىقتى دارىپتەۋ، جاڭا قوعامدىق ەتيكانى قالىپتاستىرۋ سەكىلدى باعىتتار ەگجەي-تەگجەيلى سيپاتتالادى. اۆتور تسيفرلىق كەڭىستىكتەگى جالعان اقپارات، «اقپاراتتىق رەكەت»، كەنسەلينگ مادەنيەتى سياقتى قاۋىپتەرگە دە ەرەكشە توقتالىپ، ولاردى رەتتەۋدىڭ ماڭىزىن اتاپ وتەدى.
قاريننىڭ جازۋىنشا، قازىرگى مەملەكەتتىك ساياساتتىڭ باستى ەرەكشەلىگى – جىلدام ناتيجە بەرەتىن فورمالدى ءىس-شارالاردان باس تارتۋ جانە جۇيەلىلىككە كوشۋ. سوڭعى جىلدارداعى ەكونوميكالىق ءوسىم، ينفراقۇرىلىمدىق جوبالار مەن الەۋمەتتىك سالانى جاڭعىرتۋ جۇمىستارى وسى ۇستانىمنىڭ ناتيجەسىن كورسەتەدى.
