«Egemen Qazaqstan» газетінде Мемлекеттік кеңесші Ерлан Қариннің Қазақстанның ішкі саясатының жаңа тұғырнамасына арналған кең ауқымды мақаласы шықты, деп хабарлайды "Адырна" ұлттық порталы.
Материалда Мемлекет басшысы Қасым-Жомарт Тоқаев 5 қарашада қол қойған «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлықтың тарихи маңызы жан-жақты талданады.
Ерлан Қариннің айтуынша, бұл құжат – Қазақстанда алғаш рет ішкі саясатты жүйелі түрде айқындайтын біртұтас идеологиялық және ұйымдастырушылық акт. Бұған дейін саланың әр кезеңде қабылданған бағдарламалары болғанымен, олардың арасында бірізділік болмаған және кей тұстарда бір-біріне қайшы нормалар кездескен.
Мемлекеттік кеңесші құжатты әзірлеуге танымал сарапшылар, Ұлттық құрылтай мүшелері мен ғылыми қауымдастық жарты жылдан астам уақыт еңбек еткенін атап өтті. Тұжырымдамада жалпыұлттық құндылықтар, жаңа нышандар – шаңырақ, домбыра, Абайдың «Қара сөздері» секілді ұлттық символдар бекітілген.
Мақалада «Заң және тәртіп» қағидаты, «Таза Қазақстан» жобасы, мектептегі «Адал азамат» бағдарламасы, еңбекқорлықты дәріптеу, жаңа қоғамдық этиканы қалыптастыру секілді бағыттар егжей-тегжейлі сипатталады. Автор цифрлық кеңістіктегі жалған ақпарат, «ақпараттық рэкет», кэнселинг мәдениеті сияқты қауіптерге де ерекше тоқталып, оларды реттеудің маңызын атап өтеді.
Қариннің жазуынша, қазіргі мемлекеттік саясаттың басты ерекшелігі – жылдам нәтиже беретін формалды іс-шаралардан бас тарту және жүйелілікке көшу. Соңғы жылдардағы экономикалық өсім, инфрақұрылымдық жобалар мен әлеуметтік саланы жаңғырту жұмыстары осы ұстанымның нәтижесін көрсетеді.
