تۇركياداعى «اققۇيۋ» اتوم ەلەكتر ستانتسياسىنىڭ قۇرىلىس الاڭىندا جۇمىسشىلار ەرەۋىلگە شىقتى، دەپ حابارلايدى "ادىرنا" ۇلتتىق پورتالى.
بۇل تۋرالى الەۋمەتتىك جەلىلەردە تاراعان بەينەجازبالار مەن ءتۇرلى دەرەككوزدەر حابارلايدى.
بەينەجازبالاردا جۇمىسشىلاردىڭ جالاقىنىڭ كەشىكتىرىلۋىنە بايلانىستى نارازىلىق ءبىلدىرىپ جاتقانى كورسەتىلگەن. قۇرىلىسشىلار جينالىپ، باسشىلىقتان ەڭبەكاقىلارىن ۋاقىتىلى تولەۋدى تالاپ ەتكەن.
سونداي-اق كادرلاردان قۇقىق قورعاۋ ورگاندارى وكىلدەرىنىڭ نارازىلىق بىلدىرۋشىلەردى تاراتۋعا ارەكەت ەتىپ جاتقانى بايقالادى.
ايتا كەتەيىك، «اققۇيۋ» — تۇركيادا سالىنىپ جاتقان العاشقى اتوم ەلەكتر ستانتسياسى.
بۇل جوبا رەسەي مەملەكەتتىك «روساتوم» كورپوراتسياسىنىڭ قاتىسۋىمەن جۇزەگە اسىرىلىپ جاتىر. ستانتسيانىڭ قۇرىلىسى تۇركيا ءۇشىن ستراتەگيالىق ماڭىزى بار جوبا رەتىندە قاراستىرىلادى.
قازىرگى ۋاقىتتا جاعدايعا قاتىستى رەسمي تۇسىنىكتەمە بەرىلمەگەن.
