قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگىنىڭ قولداۋىمەن تۇركيا ەلىنىڭ ىستامبۇل قالاسىندا "التىباقان" ويىن-ساۋىق ءان كەشى ءوتتى، دەپ حابارلايدى “ادىرنا” ۇلتتىق پورتالى.
قازاق حالقىنىڭ ماقتانىش ەتەر اسىل مۇراسى، رۋحاني جادىگەرلەرى ىشىندە ۇمىت بولىپ بارا جاتقان قازاقتىڭ تۇرمىس-سالتقا باعىتتالعان "التىباقان" ۇلتتىق ويىنى – قازاق جاستارىنىڭ ەرتەدەن كەلە جاتقان كەشكىلىك باس قوسىپ، ءان ايتىپ، دومبىرا تارتىپ، ايتىسىپ، بي بيلەپ، ءتۇرلى ويىندار ويناپ، كوڭىل كوتەرىپ، ويىن-ساۋىق قۇراتىن كەشى.
وسى ۇلتتىق ويىننىڭ توڭىرەگىندە اۋەلەتكەن ءداستۇرلى ءان مەن كۇمبىرلەگەن كۇي، بيلەرىمىز ءبىر-بىرىمەن استاسىپ، ويىن-ساۋىق ءان كەشى ۇسىنىلدى.
ءداستۇرلى ونەرىمىزدى ۇلىقتاۋشى «الاتاۋ» ءداستۇرلى ونەر تەاترى ۇجىمى كۇنى كەشە تۇركيا ەلىنە، ىستامبۇل قالاسىنا، «التىباقان» ويىن - ساۋىق باعدارلاماسىمەن ءىس-ساپارعا اتتاندى.
«التىباقان» ويىن - ساۋىق باعدارلاماسىندا ءداستۇرلى اندەرمەن قاتار ۇمىت بولىپ بارا جاتقان، كونە ءداستۇرلى ءان-جىرلار دا ورىندالدى. تەاترىمىزدىڭ تولىق شىعارماشىلىق توبى (60-قا جۋىق ارتيست) ونەر كورسەتتى.
بۇگىنگى كۇنى تۇركى ءالەمىن قازاق ونەرىمەن سۋسىنداتسا، بولاشاقتا قازاقتىڭ ءداستۇرلى ونەرىن الەمگە پاش ەتپەك. كۇمىس كومەي، جەز تاڭداي انشىلەرىمىز تۇرىك تىلىندە دە ءان شىرقادى.
”ادىرنا” ۇلتتىق پورتالى
