اقش پرەزيدەنتى دونالد ترامپ ميللياردەر يلون ماسكتىڭ جاڭا پارتيا قۇرۋ تۋرالى باستاماسىن سىنعا الدى، دەپ حابارلايدى «ادىرنا» ءتىلشىسى.
اق ءۇي باسشىسى ءۇشىنشى پارتيالاردىڭ ەشقاشان جۇمىس ىستەمەگەنىن ايتتى.
«وسى ۋاقىتقا دەيىن ءۇشىنشى پارتيالار ناتيجە كورسەتكەن ەمەس. ماسكتىڭ بۇل شەشىمى — كۇلكىلى نارسە»،—دەدى ول جۋرناليستەرگە بەرگەن سۇقباتىندا.
كەيىنىرەك ترامپ ءوزىنىڭ Truth Social الەۋمەتتىك جەلىسىندە ماسك تۋرالى پىكىر ءبىلدىردى.
«يلون ماسك اقىلىنان اداستى. ول ءتىپتى جاڭا ساياسي پارتيا قۇرعىسى كەلەدى ەكەن. اقش-تا ءۇشىنشى ءىرى پارتيا قۇرۋعا جاسالعان ارەكەتتەر ەشقاشان ءساتتى بولماعان. بۇل جۇيە ەكى پارتياعا ارنالعان سياقتى. ءۇشىنشى پارتيالار تەك حاوس تۋدىرا الادى. بىزدە اقىلىنان ايىرىلعان راديكالدى سولشىل دەموكراتتار ونسىز دا جەتەدى»،–دەدى پرەزيدەنت.
ەسكە سالايىق، 4 شىلدەدە يلون ماسك «امەريكا پارتياسى» دەپ اتالاتىن جاڭا ساياسي ۇيىم قۇرىلاتىنىن حابارلاعان ەدى. بۇعان دەيىن ول جەلىدەگى وقىرماندارى اراسىندا ساۋالناما جۇرگىزگەن. ولاردىڭ 65,4 پايىزى جاڭا پارتيانىڭ قۇرىلۋىن قولداعان. ميللياردەر بۇل شەشىمدى ترامپتىڭ سالىقتى ازايتۋ جانە مەملەكەتتىك شىعىنداردى قىسقارتۋ تۋرالى زاڭ جوباسىنا جاۋاپ رەتىندە قابىلداعانىن مالىمدەگەن بولاتىن.
