جەزقازعان قالاسىنىڭ جىلۋ جەلىلەرىن رەكونسترۋكتسيالاۋ جانە جاڭعىرتۋ جوباسىنىڭ ءۇشىنشى ىسكە قوسۋ كەشەنىنىڭ ەكىنشى كەزەگىن جۇزەگە اسىرۋ ءۇشىن رەزەرۆتەن 2,8 ملرد تەڭگەدەن استام قارجى ءبولىندى. بۇل تۋرالى بۇگىن، 26 ماۋسىمدا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
«جەزقازعان قالاسى جىلۋ جەلىلەرىنىڭ ۇزىندىعى 398 شاقىرىمدى قۇرايدى. نىسان 1951 جىلى پايدالانۋعا بەرىلگەن، توزۋى – 56,6%. جىلۋ جەلىلەرى تسەحىندا 1969 جىلى ىسكە قوسىلعان 8 سورعى ستانساسى بار. جىلىتۋ ماۋسىمىندا جىلۋ جەلىلەرىنىڭ توزۋى جىلۋمەن قامتۋعا كەرى اسەرىن تيگىزۋدە. رەسۋرستاردىڭ ايتارلىقتاي شىعىنى ورتا ەسەپپەن 35-40%-عا جەتەدى، بۇل قولدانىستاعى جانە سالىنىپ جاتقان نىسانداردى جىلۋ جەلىلەرىنە قوسۋعا مۇمكىندىك بەرمەيدى»،– دەلىنگەن حابارلامادا.
ايتا كەتەيىك، ۇكىمەت رەزەرۆىنەن بولىنگەن 2,8 ملرد تەڭگە جوبانى اياقتاۋعا جانە 98 مىڭنان استام تۇرعىنى بار قالانىڭ جىلۋ جەلىلەرىن ساپالى دايىنداۋعا مۇمكىندىك بەرەدى.
