جۋرناليست ساندۋعاش دۇيسەنوۆانىڭ جالاڭاش بەينەسىن تۇسىرگەنى ءۇشىن پوليتسەيلەردەن 100 مىڭ تەڭگە ءوندىرىپ الدى. وسىعان قاتىستى بۇگىن قازتاگ رەداكتسياسى ساندۋعاش دۇيسەنوۆانىڭ ارىزى بويىنشا سوت وتىرىسى وتكەنىن ايتتى، دەپ حابارلايدى “ادىرنا” ۇلتتىق پورتالى.
2023 جىلدىڭ جازىندا ول تۇندە ۇستالىپ، پوليتسيا بولىمىنە جەتكىزىلگەن بولاتىن. وعان قازاقستان رەسپۋبليكاسى قىلمىستىق كودەكسىنىڭ 147-بابى (قازاقستان رەسپۋبليكاسىنىڭ جەكە ومىرىنە قول سۇعىلماۋشىلىقتى جانە جەكە دەرەكتەر جانە ولاردى قورعاۋ تۋرالى زاڭناماسىن بۇزۋ) بويىنشا ايىپ تاعىلدى.
2022 جىلى دۇيسەنوۆا Facebook جەلىسىندە ادامدى اتىپ، بالانى جارالاعان قىلمىسكەردى ىزدەستىرۋ تۋرالى اقپاراتتى جاريالادى. دەرەكتەر اراسىندا ەر ادامنىڭ جسن-ءى دە بولعان.
كەيىن جۋرناليست ۇستالدى، ونى تولىعىمەن شەشىندىرىپ، ۆيدەوعا ءتۇسىرىپ، مۇنى «ىزدەۋ» دەپ ءتۇسىندىردى.
پوليتسيانىڭ ءوزى بۇعان سوتتىڭ رۇقساتى بار ەكەنىن مالىمدەدى. الايدا، ادام قۇقىقتارى جانە زاڭدىلىقتى ساقتاۋ جونىندەگى قازاقستاندىق حالىقارالىق بيۋرونىڭ ديرەكتورى ەۆگەني جوۆتيس دۇيسەنوۆانى جالاڭاش كۇيىندە تۇسىرگەن پوليتسەيلەردىڭ ارەكەتىنىڭ ناتيجەسىندە قازاقستان بۇۇ-نىڭ ازاپتاۋلارعا جانە باسقا دا قاتىگەزدىككە قارسى كونۆەنتسياسىن بۇزدى دەپ سانايدى. بۇل رەتتە ىشكى ىستەر ءبىرىنشى ۆيتسە-ءمينيسترى مارات قوجاەۆ قازاقستان كونۆەنتسيانى بۇزباعانىن، ەلدەگى ءتارتىپ ساقشىلارى جوعارى لاۋازىمدى تۇلعالاردى جەكە ءتىنتۋ كەزىندە جالاڭاشتاعانىن ايتتى.
ايتا كەتەيىك، دۇيسەنوۆا جەتىسۋ مەن الماتى وبلىسىنا ءوز ماتەريالدارىندا وتكىر الەۋمەتتىك ماسەلەلەردى كوتەرىپ جۇرگەن جۋرناليست رەتىندە كەڭىنەن تانىمال. سونىمەن قاتار، ول تالدىقورعاندا قاڭتار وقيعاسى كەزىندە الاڭدا جاتقان بۇزىلعان ەكس-پرەزيدەنت نۇرسۇلتان نازارباەۆتىڭ ەسكەرتكىشى بەينەلەنگەن «ءداۋىردىڭ اقىرى» اتتى الەمدى شارلاعان فوتوسۋرەتتىڭ اۆتورى رەتىندە بەلگىلى. بۇل سۋرەت ءۇشىن دۇيسەنوۆا MediaCAMP Award 2022 حالىقارالىق بايقاۋىنىڭ جەڭىمپازى اتاندى.
