بۇلدىرتى اۋىلى - باتىس قازاقستان وبلىسى، سىرىم اۋدانىنداعى اۋىلدىق اكىمشىلىك وكرۋگىنىڭ ورتالىعى. اۋدان ورتالىعى - جىمپيتى. اگروكليماتتىق قۇرعاق قوڭىرجاي بەلدەمدە ورنالاسقان. جەرى: سۇر توپىراقتى. جۋسان، بەتەگە، سەلەۋ، كودە، شي وسەدى. سوعان سايكەس شارۋا قوجالىقتارى مەن وندىرىستىك شارۋاشىلىقتارى تۇراقتى تۇردە جۇمىس جاسايدى. گەوگرافيالىق ورنالاسۋ جاعدايى جاقسى.
بۇلدىرتى اۋىلدىق وكرۋگىنە 4 ەلدى-مەكەن كىرەدى: بۇلدىرتى، كوگەرىس(كوكورىس), جارقامىس جانە قاراقۇدىق.
ۇزىندىعى 195 كم-گە سوزىلىپ جاتقان جايىق القابىنداعى بۇلدىرتى وزەنى اعىپ جاتىر. بۇلدىرتى اۋىلى ءوزىنىڭ تابيعاتىمەن ماقتانىپ قانا قويماي، تاريحقا اتى سىڭگەن بەلدى تۇلعالارىمەن دە اۋىز تولتىرىپ ايتارلىقتاي تانىتا الادى.
سونىڭ ءبىرى باتىر-شەشەن - سىرىم داتۇلى، قازاقستان جازۋشىلار وداعىنىڭ مۇشەسى، اقىن - قادىر مىرزا ءالى، كۇنباتىس الاشوردا ۇكىمەتىن باسقارعان قايراتكەر - جانشا دوسمۇحامەدۇلى ت.ب. سىندى اۋداننىڭ تاريحىنان بولەك، اۋىلدىڭ دا بەلدى تۇلعالارىن ايشىقتى تۇردە ايتا الادى.
تاريحى مەن جۇلدىزدارى تەكتىلىكپەن استاسىپ، تەرەڭگە قاراي سىر تۇنعان اۋىلدىڭ كەشەگى باستاۋ بۇلاعى سوناۋ تەرەڭدە ەكەنىن اڭعاردىق. ال ولاردىڭ بۇگىنگى دامۋى مەن ەكونوميكالىق كۇنكورىس جاعدايى قانشالىقتى ىلگەرىلەپ كەلەدى؟
ەندەشە، ءدال وسى سۇراقتى بۇلدىرتى اۋىلىنىڭ اكىمى - نۇرپەيسوۆ سالاۋات جولايۇلىنا قويىپ كوردىك.
سالاۋات جولايۇلى - باتىس قازاقستان اگرارلىق ۋنيۆەرسيتەتىن اگرونوم، اگروحيميك جانە توپىراقتانۋشى ماماندىعى بويىنشا ءبىتىرىپ شىققان.
ەڭبەك جولىن بۇلدىرتى اۋىلىندا «اندا» شارۋا قوجالىعىندا اگرونوم بولىپ باستاپ، كەيىننەن بىرقاتار لاۋازىمدى قىزمەتتەردى اتقارعان. 2014 جىلدان قازىرگى ۋاقىتقا دەيىن «سىرىم اۋداندىق مادەنيەت جانە تىلدەردى دامىتۋ، دەنە شىنىقتىرۋ جانە سپورت ءبولىمىنىڭ باسشىسى» لاۋازىمىندا قىزمەت جاساعان.
الەمدەگى سوڭعى وزگەرىستەرگە سايكەس ءدۇيىم دۇنيەنى ءدۇر سىلكىندىرىپ، قوعام قۇبىلىپ، ەپيدەميالىق جاعداي مەن ساياسي تولقىندار كۇشەيگەن تۇستا ءار باسشىنىڭ جۇكتەلگەن تاپسىرمانى مۇلتىكسىز ورىنداۋى اسا قاجەتتى دە، جاۋاپتى ءىس.
ستاتيستيكاعا سۇيەنەر بولساق، پرەزيدەنتىمىزدىڭ ايتۋىنشا حالىقتىڭ 40%-ى اۋىلدا تۇراتىنى انىقتالعان. سوندىقتان باستى ماسەلەلەر مەن ساياسي شارالاردىڭ باستاۋ بۇلاعى اۋەلى اۋىل تۇرعىندارىنىڭ مۇددەسى ءۇشىن جاسالۋ كەرەك. بۇل تۋرالى بۇلدىرتى اۋىلىنىڭ اكىمى نە ايتار ەكەن؟
- پرەزيدەنتىمىز قاسىم-جومارت كەمەلۇلى قازاقستان حالقىنا ارناعان بيىلعى جولداۋىندا "اكىمدەردى حالىق ءوزى سايلايتىن بولادى" دەگەن ەدى. مىنە، جاقىندا وتكەن سايلاۋدىڭ قورىتىندىسى بويىنشا كوپتىڭ قالاۋىنان شىعىپ، سىزگە زور جاۋاپكەرشىلىك ارتىلىپ وتىر. ءسىز ءۇشىن حالىق سايلاعان اكىمنىڭ ەڭ باستى قاسيەتى مەن تالابى قانداي بولۋ كەرەك؟
- پرەزيدەنتىمىز قاسىم-جومارت كەمەلۇلى قازاقستان حالقىنا ارناعان جولداۋى مەن تاپسىرماسىنا وراي، مەرزىمى اياقتالعان اۋىلدىق وكرۋگتەردىڭ اكىمدەرىن سايلاۋى وتكىزىلگەن ەدى. 2021 جىلدىڭ قاراشا ايىنىڭ 28 كۇنى سايلاۋ وتكىزىلىپ، تۇرعىندار ءوز تاڭداۋلارىن جاساپ، ۇمىتكەرلەردىڭ ىشىنەن مەنى تاڭداپ، وكرۋگ اكىمىنە سايلاندىم.
ەندىگى ماقساتىم - اۋىلدىق وكرۋگتى دامىتۋ باعىتىندا جاسالعان سايلاۋ الدى باعدارلامامدا كورسەتىلگەن ماسەلەلەردى جۇزەگە اسىرىپ، جەدەل جۇمىستاردى جۇرگىزۋ بولىپ تابىلادى.
مەنىڭ ۇعىمىمدا حالىق سايلانعان اكىمنىڭ ەڭ باستى قاسيەتى - جەرگىلىكتى حالىق تۇرعىنداردىڭ ويىنان شىعىپ، قوعاممەن قويان قولتىق جۇمىس جاسالۋ كەرەك. وزىمە قويعان نەگىزگى تالابىم - اۋىل تۇرعىندارىنىڭ زامان تالابىنا ساي ءومىر ءسۇرۋىن قامتاماسىز ەتىپ، ءوڭىرىمىزدىڭ كوركەيۋى مەن وركەندەۋىنە ناقتى جوسپارلاردى جۇزەگە اسىرۋىم ءتيىس.
- بۇلدىرتى اۋىلى سىرىم اۋدانى بويىنشا حالىق سانى مەن كولەمى جاعىنان ەڭ ۇلكەن اۋىلداردىڭ ءبىرى. الداعى ۋاقىتتا ءوڭىرىمىزدىڭ ءحال-اۋقاتىن ارتتىرۋ جانە جۇمىسپەن قامتۋ باعىتى بويىنشا اۋىلدىڭ ودان ءارى وركەندەۋىنە قانداي جوبالار ىسكە اسىرىلماق؟
- ءيا، اۋدانىمىزدا بارلىعى 12 اۋىلدىق وكرۋگ بولسا، سونىڭ ىشىندە ۇلكەنى، اۋدان ورتالىعىنان كەيىنگى وكرۋگ - بۇلدىرتى اۋىلدىق وكرۋگى بولىپ وتىر. وكرۋگتە ءۇش مىڭعا تارتا تۇرعىندار بار. الداعى ۋاقىتتا وكرۋگتى دامىتۋ، تۇرعىنداردىڭ ءحال-اۋقاتىن ارتتىرۋ جانە جۇمىسپەن قامتۋ باعىتىندا مەملەكەتتىك باعدارلاماردى ىسكە اسىرۋ جوباسى بويىنشا ءبىراز مىندەتتەمەلەر جاسالادى.
ياعني، اۋىلدىق وكرۋگتەگى اۋىل شارۋاشىلىق سالاسىن دامىتۋ، اسىل تۇقىمدى مال باسىن كوبەيتۋگە جۇمىستانۋ، شارۋاشىلىقتاردى مەملەكەتتەن بەرىلەتىن قايتارىمسىز گرانتتار الدىرۋ ارقىلى تۇرعىنداردىڭ كاسىپپەن اينالىسۋلارىنا، سول ارقىلى وزدەرىنىڭ تۇرمىس تىرشىلىكتەرىن كوتەرىپ، جۇمىسپەن قامتىلۋلارىنا جاعداي جاسالماق.
قازىرگى كەزدە تۇرعىنداردى جۇمىسپەن قامتۋ ءۇشىن گرانتتار نەمەسە نەسيەلەر الۋ ارقىلى مال ءوسىرۋ نەمەسە ءسۇت ءوندىرۋ، قۇس ءوسىرۋ، باۋ-باقشا ەگۋگە باعىتتالعان جوبالاردى تۇرعىندارعا ناسيحاتتاپ جۇزەگە اسىرۋعا جۇمىستانۋدامىز.
- از ۋاقىت ىشىندە حالىققا ەسەپ بەرىپ ۇلگەردىڭىز. بۇلدىرتى اۋىلىنىڭ تۇرعىندارى اراسىنان قانداي دا ءبىر كاسىپ اشامىن، جوبا باستايمىن دەگەن حالىق يگىلىگىنە ارنالعان باستامالارعا اكىمدىك تاراپىنان قانداي قولداۋلار بولادى؟ (جالپى اۋىلدا ءوڭىر وركەندەۋىنە ۇلەس قوسىپ جۇرگەن قانداي كاسىپكەرلەردى ايتا الاسىز؟)
- جىل سايىن بارلىق دەڭگەيدەگى اكىمدەر تۇرعىندار الدىندا ەسەپ بەرىپ، الداعى ۋاقىتتا جۇزەگە اسىراتىن جۇمىستارمەن قاتار، تۇرعىنداردىڭ ۇسىنىس پىكىرلەرىن تىڭدايدى.
مەن دە وتكەن جىلدارى اتقارعان جۇمىستار مەن الدا تۇرعان مىندەتتەر جونىندە حادىق الدىندا ەسەبىمدى بەردىم.
جالپى جىل وتكەن سايىن ەلىمىزبەن بىرگە اۋىلدارىمىز دا دامىپ، زامان تالابىنا ساي تۇرعىنداردىڭ دا ۇسىنىس پىكىرلەرى مەن تالاپتارى وزگەرىپ كەلەدى.
ولاردىڭ ۇسىنىستارىنا ساي جۇمىستاردى قولعا الۋ – ەڭ باستى مىندەت بوپ ەسەپتەلەدى. حالىق اراسىنان كاسىبىن اشامىن، جوبا باستايمىن دەگەن ازاماتتارعا اكىمدىك تاراپىنان قابىلدانىپ جاتىرعان باعدارلامالاردىڭ تالاپتارىن ءتۇسىندىرۋ مەن قاتار، كاسىبىنە قاراي مۇمكىندىك بولسا ورىندارمەن نەمەسە دالالىق جەرلەردەن جەر بەرۋ سياقتى ماسەلەرگە قولداۋ بىلدىرىلەتىن بولادى.
زامانعا قاراي ءار اۋىلدىڭ باس كوتەرگەن ازاماتتارى مەن كاسىپكەرلەرى، «تۋعان جەرگە تاعزىم» نەمەسە «رۋحاني جاڭعىرۋ» سياقتى باعدارلامالاردىڭ اياسىندا اۋىلعا كومەك قولىن سوزىپ ءتۇرلى سالالار بوتسىنشا كومەك كورسەتىلىپ جاتىر.
ايتا كەتەتىن بولساق، ۋرازوۆ ەرگەن، گۋسمانوۆ تالعات، نۋرپەيسوۆ ىلەسبەك، سۇلەيمەنوۆ بەرىك، تورەباەۆ ءىلياس سياقتى ازاماتتار مەن قاتار اۋىلداعى ساۋدا ساتتىق ورىندارىنىڭ يەلەرى مەن شارۋاشىلىق باسشىلارى جانە جىل تۇلەكتەرى اۋىل وركەندەۋىنە ۇدەس قوسۋدا قول ۇشىن سوزۋدان تايىنعان ەمەس.
اۋىلدا بىرنەشە دۇكەن بار. سوڭعى اشىلعان دۇكەندەردىڭ ءبىرى - بۇلدىرتى اۋىلدىق وكرۋگىنىڭ تۇرعىنى گۇلشات قۋانىشقاليەۆانىڭ ناۋبايحاناسى.
ول 2003 جىلدان بەرى كاسىپكەرلىكپەن اينالىسىپ كەلەدى. قازىر كيىم ساتۋدان بولەك، تاپسىرىسپەن كورپە جاساعان.
ەندى ءوزىنىڭ جەكە دۇكەنىن اشىپ وتىر. «كەردەرى» دۇكەنىنەن ازىق – تۇلىك تە، تۇرمىستىق تاۋارلار مەن كيىمدەردى دە تابا الاسىز. كاسىپكەر وسى جۇمىس ارقىلى اۋىلدىڭ 2 تۇرعىنىن تۇراقتى جۇمىسپەن قامتىپ وتىر.
دۇكەننىڭ باعالارى اۋدان ورتالىعىنداعى باعالاردان تومەن. حالىقتىڭ نانعا دەگەن سۇرانىسى ەشقاشان تومەندەگەن ەمەس. وسىعان بايلانىستى دۇكەننىڭ جانىنان كۇنىنە 100 قالاش نان دايىندايتىن ناۋبايحانا دا اشىلدى.
حالىققا قاجەتتى ونىمدەردى قالادان تاسىمالداماي-اق، وزدەرى ۇسىنۋى حالىققا دا، كاسىپكەرلەرگە دە وتە ءتيىمدى. ودان بولەك جاستار اراسىندا ۇيدەن كىشىگىرىم كاسىبىن اشىپ، ءناسىبىن تاۋىپ وتىرعاندار دا جەتەرلىك.
باسىم كوپشىلىگى كونديتەرلىك ءونىمدى ساتۋمەن اينالىسسا، ەندى ءبىرى مەرەكەلەرگە ارنالعان ءتۇرلى ديزاينداعى شاقىرۋ بيلەتتەرىن جاساۋمەن اينالىسادى.
جالپى باسقا اۋىلدارمەن سالىستىرمالى تۇردە قاراعاندا حالىقتىڭ تۇرمىستىق دەڭگەيى جاقسى دەۋگە تولىق نەگىز بار. سەبەبى، ءوز جۇمىسىن حالىققا ۇسىنعان شاعىن كاسىپكەرلەرگە سۇرانىس دەڭگەيى دە تۇراقتى تۇردە كوبەيىپ وتىر.
تيىسىنشە قاجەتتى جابدىقتارى ءۇشىن الىسقا بارماي-اق ءار جەرگىدىكتى تۇرعىن ءوز اۋىلىنداعى ساپالى قىزمەتتى تاڭداي الادى.
زامان تالابى مەن سۇرانىسىنا وراي قازىر ءار ءتۇرلى سالالار دامىپ كەلەدى. ەڭبەكتىڭ كوزىن تابامىن دەگەن ءار جالىندى جاستار جىگەرىن جانشىتپاي كاسىپ باستايمىن دەسە، قولدان كەلگەنشە بار قىزمەت ءتۇرىن ۇسىنۋعا اكىمشىلىك تاراپى قاشان دا دايىن.
- اۋىلعا قازىرگى ۋاقىتتا ناقتى نە جەتىسپەيدى؟ ەڭ وزەكتى ماسەلەلەر مەن ونىڭ شەشىمى قانداي بولماق؟
- اۋىلدى دامىتۋ مەن كوركەيتۋدە ءالى دە كوپتەگەن ماسەلەلەردى شەشۋ قاجەت ەتەتىنى بەلگىلى. ەڭ باستىسى وكرۋگىمىز- كوگىلدىر وتىنمەن قامتىلعان.
بۇلدىرتى اۋىلى ورتالىقتاندىرىلعان اۋىز سۋ جۇيەسىنە قوسىلعان. زاماناۋي بايلانىس جۇيەسىمەن قامتىلعان، اۋىلعا كىرمە جول جوندەۋدەن وتكىزىلگەن.
ەندىگى جەردە اۋىلدىڭ ىشكى جولىنا قاتتى توسەنىش سالۋ ارقىلى جوندەۋ، اۋىل كوشەلەرىن كوركەيتۋ جانە ورتالىق ساياباقتى تۇرعىنداردىڭ دەم الاتىن ورنىنا اينالدىرۋ، كوگەرىس اۋىلىنىڭ تۇرعىندارىن ورتالىقتاندىرىلعان اۋىز سۋ جۇيەسىنە قوسۋ جانە كوگەرىس اۋىلىنا جول ماسەلەسىن شەشۋ سياقتى وزەكتى ماسەلەلەردى شەشۋ نەگىزگى ماقساتىمىز بولىپ وتىر.
قازىرگى كەزدەگى ەكولوگيالىق ماسەلە سۋ كوزدەرىنىڭ ازايۋى الاعداتۋشىلىق تۋعىزۋدا. سوندىقتان بۇلدىرتى وزەنىنىڭ بۇلاق كوزدەرىن اشىپ، اۋىل ىرگەسىندەگى سۋ قورىن مولايتۋ دا - وزەكتى ماسەلەلەردىڭ ءبىرى.
ونىڭ شەشىمى اۋىل تۇرعىندارىنىڭ بىرىگىپ جۇمىستانۋى بولىپ تابىلادى. قالعان ماسەلەلەردى اۋدان باسشىلىعىنا ۇسىنىس بىلدىرە وتىرىپ، بيۋدجەتتەن قاراجاتتار ءبولىپ، العاشقى ورىندا جوبالىق سمەتالىق قۇجاتتارىن جاساتۋدى قاجەت ەتەدى، قالعانى ۋاقىتتىڭ ەنشىسىندە.
سونىمەن قاتار اۋىلدا جاستاردىڭ، جالپى تۇرعىنداردىڭ سپورتپەن شۇعىلدانۋلارىن قامتاماسىز ەتىپ، سپورت تۇرلەرىن دامىتۋ باعىتىندا، اۋىلدان دەنە شىنىقتىرۋ كومپلەكسىن سالدىرۋدى قاجەت دەپ سانايمىن.
ونىڭ جوبالىق سمەتالىق قۇجاتتاماسى دايىن، بيىلعى جىلى قاراجات بولىنگەن جاعدايدا قۇرىلىسى باستالادى دەپ كۇتىپ وتىرمىز.
سونىمەن بىرگە قىسقى سپورت تۇرلەرىن دامىتۋدا اۋىلدان حوككەي قورابىن سالۋ ويىمىزدا بار. بۇل ءىستى اۋىل جاستارى، سونىڭ ىشىندە 1984 جىلى تۋىلعان ازاماتتاردىڭ باستاماسىمەن ىسكە اسىرعىمىز كەلەدى. جالپى وسىعان دەيىن دە بۇلدىرتى جاستارىنىڭ اراسىنان ءتۇرلى سپورت سالاسى بويىنشا الەمدىك دەڭگەيدە باق سىناعان سپورتشىلارىمىز بار.
سونىڭ ءبىرى قازاق كۇرەسىنەن ازيادا جانە الەم چەمپيونى – بەكجانوۆ نۇرلان باقىتۇلى. اۋىلدان شىققان كىشكەنتاي بالا ۇلكەن دەڭگەيلەر مەن بەلەستەردى باعىندىرىپ، قازىر اۋىل عانا ەمەس، بارشا قازاقتىڭ ماقتانىشىنا اينالىپ وتىر.
ودان بودەك قول كۇرەس پەن باسقا دا قوسىمشا ۇيىرمەلەردەن حالىقارالىق، الەمدىك دەڭگەيدە جەلكەندى جەتىستىكتەرگە جەتىپ جاتقان جالىندى جاستارىمىز كوپ.
ەگەر قاراجات ءبولىنىپ، سپورت كەشەنى سالىناتىن بولسا، بۇل جاستارعا دەگەن ۇلكەن قولداۋ مەن مۇمكىندىكتەر ەسىگىنىڭ ايقارا اشىلعان قاقاپاسى بولماق.
جەلكەندى جەتىستىكتەرگە جەتەتىڭ جاستاردىڭ دا قاراسى قالىڭداماق. سونىمەن قاتار اۋىلدىق وكرۋگىمىز سامارا-شىمكەنت رەسپۋبليكالىق اۆتوجولى بويىندا ورنالاسقاندىقتان، وسى جولدىڭ الەۋەتىن پايدالانۋىمىز قاجەت دەپ ەسەپتەيمىن.
جول بويىنان قىزمەت كورسەتۋ ورىندارىن اشۋعا ىسكەر ازاماتتارعا ۇسىنىستار بەرۋدەمىز. ەگەر وسى ۇسىنىس جۇزەگە اسقان جاعدايدا جۇمىسسىز ازاماتتارىمىزدى جۇمىسپەن قامتۋدىڭ بىردەن ءبىر كوزىنە اينالماق.
- "جاس كەلسە ىسكە" دەگەن حالىق ماقالى بار. جاس بۋىنعا قاي ءىستى جۇكتەسەڭ دە دوڭگەلەتىپ اكەتەرى انىق. وسىنى ەسكەرىپ، حالىق اراسىنان بەلسەندى جاستارعا ارنالعان جوبالاردى ىسكە اسىرۋ ويدا بار ما؟
- جاستار - ءبىزدىڭ بولاشاعىمىز. جاستاردى قاشان دا قولداۋىمىز قاجەت. ولاردان كۇتەتىن ءۇمىتىمىز زور. سول سەبەپتى ەلىمىزدىڭ بولاشاعى - جاستاردى تاربيەلەۋ، ولارعا دۇرىس باعىت باعدار بەرۋ – ءبىزدىڭ ەڭ اۋەلگى ماقساتىمىزعا اينالۋى كەرەك.
ولاردىڭ ەلگە تيگىزەتىن باستامالارىن قولداۋعا ارقاشان دايىنبىز. الايدا وكىنىشكە وراي جاستار اراسىندا ءالى دە بولسا ەنجارلىق باسىمداۋ بولىپ تۇرعانى جاسىرىن ەمەس.
بارلىعى ۇيالى تەلەفوننىڭ شىرماۋىنا شىرمالعان ۋاقىتتا، سانالارىنا دا الەۋمەتتىك جەلىنىڭ الەمى ۇيالاپ العان سەكىلدى.
ويتكەنى، جاستاردا ەڭ اۋەلگى دەنە بەلسەندىلىگى ازايىپ كەتتى. كوپشىلىك بۋىن وڭاي جولمەن از ۋاقىتتا مول تابىسقا كەنەلگىسى كەلەدى. ۆيزۋالدى الەمنىڭ قۇرباندارىنا اينالىپ جاتقانىن وزدەرى دە اڭعارماي بارادى.
سوندىقتان ءبىز وكرۋگتەگى مادەنيەت ءۇيى، كىتاپحانا، ءبىلىم مەكەمەلەرى ارقىلى جاستارعا ارنالعان ءتۇرلى شارالاردى ۇنەمى ۇيىمداستىرىپ كەلەمىز.
ەرتەرەكتە جاستاردان قۇرىلعان ءتۇرلى ونەر ۇيىمدارى بولعانىن ءبىز جاقسى بىلەمىز. سوندىقتاندا جاستاردىڭ اراسىنان ونەرلى جاستاردى، بەلسەندى جاستاردى تارتا وتىرىپ، ۇلتتىق ونەرىمىزدى دامىتاتىن، ناسيحاتتايتىن ۇيىمدار قۇرعىمىز كەلەدى.
ارينە ول ەرىكتى تۇردە جۇزەگە اساتىن پروتسەسس. ەلىم دەيتىن، پاتريوتتىق سەزىمى مەن سانا سەزىمى جوعارى جاستاردى تابۋ - ۋاقىت ەنشىسىنە قالادى دەپ ويلايمىن.
مۇنداي شارالار ودان بولەك مەكتەپ قابىرعاسىندا دا تاقىرىپتىڭ ەڭ نەگىزگى وزەگىنە اينالىپ وتىر. وقۋشىلار اراسىندا ءتۇرلى ينتەللەكتۋالدىق جارىستار مەن لوگيكالىق ويلاۋدى دامىتاتىن شارالار مەن سپورتتىق جارىستار ءجيى وتكىزىلەتىنىن كورىپ كەلەمىن.
ودان بولەك اۋدان ورتالىعىنان «سىرىم جاستارى» رەسۋرستىق ورتالىعى مەكتەپپەن ءجيى بايلانىس ورناتىپ، مادەني شارالار مەن قوعامدىق جۇمىستارعا شاقىرىپ كەلەدى.
بۇل جاستاردىڭ ويلاۋ دەڭگەيى مەن ءوز بەلسەندىلىكتەرىن ارتتىرۋعا تاپتىرماس مۇمكىندىك دەپ ەسەپتەيمىن.
- بۇلدىرتى اۋىلىنان بولەك وعان قاراستى بىرنەشە شاعىن اۋىلدار بار. ولاردىڭ ەكونوميكالىق دامۋى بۇلدىرتى اۋىلىمەن قاتار كەلە جاتىر ما؟
- وكرۋگتە كوگەرىس (كوكورىس), قاراقۇدىق، جارقامىس اتتى ەلدى مەكەندەر بار. وسىلاردىڭ ىشىندە كوگەرىس ەلدى مەكەنىندە تۇراقتانعان ەكى ءجۇزدىڭ ۇستىندە تۇرعىندارى بار.
مەكتەپ، فەلدشەرلىك پۋنكت پەن كىتاپحانا جۇمىس جاساپ تۇرعان ەلدى مەكەننىڭ ءبىرى. وسى ەلدى مەكەننىڭ ەكونوميكالىق دامۋى بۇلدىرتى اۋىلىمەن قاتار كەلە جاتىر دەپ ايتا الامىن.
سەبەبى، اۋىلعا قاجەتتى دۇنيەلەر جايمەن جۇزەگە اسىرىلىپ كەلەدى. ماسەلەن، قىس ۋاقىتىندا «Activ» ۇيالى بايلانىس جەلىسى ورناتىلدى. ەندى اۋىل تۇرعىندارى شالعايداعى تۋىستارىمەن ەركىن حابارلاسىپ، عالامتوردى قالاعانىنشا پايدالانا الادى.
وسىعان دەيىن كوگەرىس اۋىلىنىڭ شەتىندە عانا «Beeline» بايلانىسى ۇستايتىن بولسا، ەندى قازىر «Activ» - جەدەل دە قولجەتىمدى جەلىنىڭ بىرىنە اينالدى. قالعان ەكى اۋىلدا وكىنىشكە وراي جەرگىلىكتى حالقىنىڭ تۇرمىس تىرشىلىگىنە قولايلى جەرلەرگە كوشۋلەرىنىڭ باستى سالدارىنان قاراقۇدىق، جارقامىس ەلدى مەكەندەرىندە تۇرعىندار سانى ۋاقىت وتكەن سايىن ازايىپ وتىر.
- ءار اكىم زامان ىلگەرۋلەۋىنە ساي جۇمىس جاساپ، جاڭا دۇنيەلەرگە ۇمتىلىپ، حالىقپەن جاقىن بايلانىس ورناتادى.
اۋىلدىڭ رۋحاني دامۋى مەن جوبالاردىڭ ءتيىمدى تۇردە جەدەل ىسكە اسۋى ءۇشىن قانداي جاڭاشا تاسىلدەردى قولدانار ەدىڭىز؟
- زامان ىلگەرىلەۋىنە وراي، تۇرعىنداردىڭ ۇسىنىس پىكىرلەرىنە ساي جۇمىستى جاڭاشا ۇيىمداستىرۋدى قاجەت ەتەدى. سونىمەن قاتار، "اشىق اكىمدىك" تالابىنا ساي تۇرعىندارمەن ەتەنە جاقىن ارالاسىپ، جۇمىس جاساۋ - بىزگە قويىلىپ وتىرعان ەڭ نەگىزگى تالاپتاردىڭ ءبىرى.
سونىمەن قاتار، جەرگىلىكتى جەردەگى قوعامداستىق مۇشەلەرىمەن بىرگە تىعىز قارىم قاتىناستا جۇمىس جۇرگىزۋىمىز قاجەت، ياعني اۋىلدى دامىتۋدا ەڭ العاشقى ورىندا جۇزەگە اسىرىلاتىن جۇمىستارعا قاراجاتتاردى ءبولۋدى قوعامداستىق وكىلدەرىنىڭ پىكىرلەرىن ەسكەرە وتىرىپ، ىسكە اسىرۋىمىز كەرەك.
وسىنىڭ ارقاسىندا جوبالاعان ىستەر جەدەل ىسكە اساتىن بولادى دەپ ەسەپتەيمىن. اۋىلدى وركەندەتۋ – ونى دامىتۋمەن عانا شەكتەلمەيدى.
حالىقتىڭ رۋحاني وي-ءورىسى مەن دامۋى دا ەڭ ماڭىزدى مىندەت بوپ سانالادى. سەبەبى، اۋىلدىڭ ەكونوميكالىق ءوسۋى مەن قارىشتاپ دامۋىنا اسەر ەتەتىن ەڭ اۋەلگى فاكتور - «رۋحاني بايلىق».
وسى تۇستا ءسىزدىڭ سوزىڭىزگە قوسىلۋعا تولىق نەگىز بار دەپ ەسەپتەيمىن. قازىرگى ۋاقىتتا ونلاين جانە وفلاين ءبىلىم بەرۋ باعىتى مەن بيزنەس باستاۋ جولدارىنىڭ جۇرگىزىلۋ سالالارى مەن باعىتتارى وتە كوپ.
ەگەر ادام ىزدەنسە، دەرەككوزدەردەن قاجەت دەپ تانىعان اقپاراتتاردىڭ بارلىعىن قابىلداي الاتىن قابىلەتكە يە. ءبىلىم – قاشان دا العا جەتەلەيدى.
اۋىلدىڭ وركەندەۋىنە ءبىر عانا بىلىكتى جانە ءبىلىمدى ادامنىڭ جۇمىس جاساۋى جەتكىلىكسىز. ەگەر، ءار اۋىلدىڭ تۇرعىنى شىنايى تۇردە ءوڭىرىنىڭ وركەندەگەنىن قالاسا، اۋەلى رۋحاني تۇرعىدان ءوزىن-ءوزى جەتىلدىرۋى ءتيىس.
بۇل ءسوز جالپى قازاقستاننىڭ نەگىزگى ۇرانىنا اينالسا، قازاقستاننىڭ بولاشاعى جارقىن بولاتىنىنا سەنىمىم زور.
ويتكەنى، ءبىلىم – قاراڭعى تۇڭعيىقتان اداستىرماي الىپ شىعاتىن جارىق شام ىسپەتتەس اسىل دۇنيە.
-سۇحباتتاسۋعا كەلىسىم بەرگەنىڭىز ءۇشىن راقمەت، سالاۋات جولايۇلى!
الداعى ۋاقىتتا جۇمىسىڭىزعا ساتتىلىك پەن تاۋسىلماس قۋات تىلەيمىن.
ءىنجۋ ومىرزاق،
”ادىرنا” ۇلتتىق پورتالى
