7 sáýir kúni Tesla kompanııasynyń akııalary aldyn ala saýdada 214 dollarǵa deıin tómendedi, dep habarlaıdy “Adyrna” ulttyq portaly Oxu.Az-ǵa siltep.
Bloomberg pen Oxu.Az habarlaýynsha, mundaı quldyraýǵa kompanııanyń ishki máselelerinen bólek, AQSh prezıdenti Donald Tramptyń jarııalaǵan saýda soǵysy sebep bolǵan. Importqa salynǵan jappaı kedendik salyqtar ınvestorlar arasynda úlken alańdaýshylyq týdyryp, qor naryǵy kún saıyn birneshe paıyzǵa tómendep jatyr.
Buǵan deıin, Tramptyń saılaýdaǵy jeńisinen keıin Tesla akııalary sharyqtaý shegine jetken edi. Sebebi Ilon Mask respýblıkalyq prezıdenttiń jaqyn odaqtasyna aınalyp, memlekettik basqarýdy tıimdi etý jobalaryna qatysa bastady. Biraq Tramptyń alǵashqy qadamdary men Tesla-nyń álsiz satylym kórsetkishteri akııalardyń quldyraýyna ákeldi.
Jeltoqsandaǵy eń joǵary kórsetkishpen salystyrǵanda akııalar 1,5 ese arzandady. Buǵan Masktyń saıası belsendiligine qarsy narazylyqtar men kompanııa ımıdjiniń nasharlaýy áser etken.
Mask alǵash ret Tramptyń baǵytyna qarsy shyǵyp, EO men AQSh arasyndaǵy ımporttyq baj salyǵyn alyp tastaý kerek ekenin aıtty. Al Tramp óz kezeginde Eýropany AQSh-tan júzdegen mıllıard eýro urlady dep aıyptap, ony qaıtarýdy talap etti.
Aıta keteıik, Ilon Masktyń Amerıka saıasatyna belsendi aralasýy Tesla kompanııasyna úlken qıyndyqtar týdyrǵany týraly habarlaǵan edik.
