AQSh prezıdenti Donald Tramp sársenbi kúni Ýkraına basshysy Vladımır Zelenskıımen telefon arqyly sóılesti, dep habarlaıdy "Adyrna" ulttyq portaly.
Bul týraly ol Truth Social áleýmettik jelisinde jazdy.
«Jańa ǵana Ýkraına prezıdenti Vladımır Zelenskıımen telefon arqyly óte jaqsy sóılestim», – dep atap ótti Tramp. Onyń aıtýynsha, áńgime shamamen bir saǵatqa sozylǵan.
«Talqylaýdyń negizgi bóligi Reseı men Ýkraınanyń óz talaptary men qajettilikterine qatysty ustanymdaryn úılestirý maqsatynda keshe prezıdent Pýtınge qońyraý shalýǵa arnaldy. Biz durys baǵytta nyq qadam basyp kelemiz», – dep túsindirdi ol.
Tramp memlekettik hatshy Marko Rýbıoǵa jáne AQSh prezıdentiniń ulttyq qaýipsizdik jónindegi keńesshisi Maık Ýoltqa «talqylanǵan máselelerdiń naqty mazmunyn» daıyndaýdy tapsyrǵanyn aıtty.
«Bul málimdeme jaqyn arada jarııalanady», – dep tolyqtyrdy amerıkalyq kóshbasshy.
Aıta keteıik, 18 naýryz, seısenbi kúni AQSh pen Reseı prezıdentteri Donald Tramp pen Vladımır Pýtın telefon arqyly sóılesken bolatyn.
Sondaı-aq, Ýkraına men Reseı 175-ten 175 formýlasy boıynsha áskerı tutqyndarmen almasty.
