2024 jyldyń 25 jeltoqsanda bolǵan Aqtaýdaǵy ushaq apatyna baılanysty reseılik saqtandyrý kompanııasy Azal áýekompanııasynyń Embraer 190 ushaǵy úshin ótemaqyny tolyǵymen tóledi. Bul týraly kompanııa bas dırektorynyń avıaııalyq jáne ǵaryshtyq saqtandyrý jónindegi orynbasary Ilıa Kabachnık málimdedi, dep habarlaıdy “Adyrna” ulttyq portaly.
Sondaı-aq reseılik kompanııa mert bolǵan jáne aman qalǵan jolaýshylarǵa tólem tóleýdi bastady.
«Ushaq úshin tólem aqpan aıynda tolyq kólemde jasaldy», - dedi ol.
Alaıda ótemaqy mólsheri qansha bolǵany aıtylmady. Sarapshylardyń pikirinshe, bul shamamen 25-30 mıllıon dollar bolýy múmkin.
Eske salsaq, Azerbaijan Airlines áýekompanııasynyń Embraer ERJ 190-100 jolaýshy ushaǵy byltyr 25 jeltoqsanda Aqtaý mańyna qulady. Qaza tapqan 38 adamnyń altaýy – Qazaqstannyń, 25 adam – Ázerbaıjannyń, jeteýi - Reseı azamattary.
Ázerbaıjan prezıdenti Ilham Álıev ushaq apatyna "Reseıdiń ókilderi jaýapty" dep málimdedi. Álıev Reseıden kinásin moıyndaýdy jáne osy oqıǵaǵa kinálilerdi jazalaýdy talap etti. Reseı prezıdenti Vladımır Pýtın Ázerbaıjan ushaǵynyń apatqa ushyraýyna baılanysty keshirim suraǵan bolatyn.
