AQSh prezıdenti Donald Tramp transgender sportshy áıelderdiń áıelder arasyndaǵy sporttyq jarystarǵa qatysýyna tyıym salatyn jarlyqqa qol qoıdy. Bul týraly ol Aq úıde áıelder men qyz sportshylardyń aldynda málimdedi, dep habarlaıdy "Adyrna" ulttyq portaly.
"Budan bylaı áıelder sporty tek áıelderge arnalǵan", – dedi Tramp jarlyqqa qol qoıý rásiminde. Sondaı-aq, AQSh-tyń transgender sportshylarǵa vıza berýden bas tartatynyn atap ótti.
Jarlyq negizinen mekteptik, ýnıversıtettik jáne áýesqoı jarystarǵa qatysty bolady. Alaıda, Tramp 2028 jyly Los-Andjeleste ótetin Olımpıada oıyndaryna deıin Halyqaralyq Olımpıada komıtetinen transgender sportshylarǵa qatysty erejelerdi qaıta qaraýdy talap etetinin málimdedi.
Jarlyqta "Kóptegen bilim berý mekemeleri men sporttyq qaýymdastyqtar er adamdarǵa áıelder sportynda jarysýǵa ruqsat berdi. Bul áıelder úshin qorlaý, ádiletsizdik jáne qaýip tóndiredi, sondaı-aq olardy teń múmkindikterden aıyrady" delingen.
Sonymen qatar, Tramp ınaýgýraııasy kezinde AQSh memlekettik saıasaty tek eki jynysty – erkek jáne áıel dep tanıtynyn jarııalap, osyǵan sáıkes jarlyqqa qol qoıdy.
CNN málimetinshe, jarlyqqa qol qoıý aldynda Tramp ótken jylǵy Parıj Olımpıadasynda áıelder arasyndaǵy boks jarystarynda altyn medal jeńip alǵan eki sportshynyń transgender ekenin aıtqan. Alaıda, bul málimet shyndyqqa sáıkes kelmeıdi. Aljırlik Iman Helıf pen Taıvandyq Lın Iýıtın jynysyn ózgertpegen jáne árdaıym áıelder arasynda jarysqan.
Halyqaralyq Olımpıada komıtetiniń prezıdenti Tomas Bah bul eki sportshynyń árdaıym áıel retinde tanylǵanyn jáne olardyń genderlik sáıkestigine eshqashan kúmán týyndamaǵanyn málimdedi.
