Aq üi basşysy Donald Tramp Amerika halqyna televiziialyq ündeu jasap, bır aidan astam uaqyt būryn bastalǧan AQŞ pen İzraildıŋ İranǧa qarsy soǧysy qaşan aiaqtalatyny turaly naqty jauap bermedı, dep habarlaidy «Adyrna» tılşısı BBC-ge sılteme jasap.
Tramp tek äskeri äreketterdıŋ aiaqtaluǧa jaqyn ekenın taǧy da qaitalap, Tegeranǧa «asa küştı soqqy» jasaluy mümkın ekenın eskerttı.
Onyŋ aituynşa, amerikalyq äskeri küşter İranǧa qarsy soǧysta aldaryna qoiylǧan mındetterdı ıs jüzınde oryndap qoiǧan jäne qaqtyǧys jaqyn arada aiaqtalady.
«Bız būl ıstı aiaqtamaqpyz jäne ol öte tez jüzege aspaq. Maqsatymyzǧa öte jaqynbyz», — dedı Tramp.
Sondai-aq AQŞ prezidentı Amerika İrannyŋ äskeri-teŋız jäne äskeri-äue küşterın joiyp, ballistikalyq zymyran baǧdarlamasy men iadrolyq qaruyn tūralatqanyn taǧy da mälımdedı. Onyŋ sözınşe, soqqylar aldaǧy ekı-üş apta boiy jalǧasady.
Ol būǧan qosa, Ormuz būǧazy AQŞ-qa emes, basqa elderge qajet ekenın taǧy da atap öttı. Tegeran bır aidan berı ıs jüzınde būǧattap otyrǧan būl būǧaz qaqtyǧys aiaqtalǧan soŋ tabiǧi türde qaita aşylady dep sendırdı.
Tramptyŋ aituynşa, aldaǧy ekı-üş apta ışınde AQŞ «asa küştı soqqy» jasamaq.
Soǧysqa bailanysty janarmai baǧasynyŋ ösuın ol «qysqa merzımdı qūbylys» dep atady.
«Köptegen amerikalyq el ışınde benzin baǧasynyŋ soŋǧy ösuıne alaŋdap otyr.
Būl qysqa merzımdı ösım İran rejimınıŋ qaqtyǧysqa eş qatysy joq elderdıŋ kommersiialyq mūnai tankerlerıne jasaǧan essız terroristık şabuyldarynyŋ saldary boldy»,-dedı prezident.
