Qazaqstan Prezıdenti Qasym-Jomart Toqaev Reseıdiń Qazan qalasynda ótken «BRIKS+» sammıtine qatysty, dep habarlaıdy "Adyrna" ulttyq portaly.
Bul týraly Aqorda baspasóz qyzmeti málimdedi. Memleket basshysy «BRIKS+» sammıtine qatysyp, plenarlyq otyrysta sóz sóıledi. Óz sózinde BRIKS uıymynyń jahandyq yqpaldylyq ortalyǵyna aınalyp jatqanyn jáne ózara tıimdi yntymaqtastyqqa umtylǵan kóptegen elderdiń oǵan qyzyǵýshylyq bildirip otyrǵanyn atap ótti.
«BRIKS-tiń damýǵa degen zor áleýeti bar jáne ol ártúrli kontınentterdiń memleketterin biriktirip, barlyq qatysýshylardyń ıgiligi úshin ortaq múmkindikterdi tıimdi paıdalana otyryp, yntymaqtastyqty nyǵaıtady. BRIKS bolashaqty birlesken órkendeý, ózara qurmet pen seriktestik qaǵıdattaryna negizdele otyryp qurý úshin qajetti resýrstar men tájirıbege ıe», - dedi Prezıdent.
Qazaqstan Prezıdentiniń pikirinshe, BRIKS-tiń kópjaqty kúsh-jigeri BUU qyzmetin úılesimdi tolyqtyrady. Óıtkeni BUU álemdik turaqtylyq pen qaýipsizdikti qamtamasyz etetin ámbebap qurylym bolyp qala beredi.
«Qazaqstan BUU Qaýipsizdik Keńesin reformalaýdy jáne ony Afrıka, Latyn Amerıkasy jáne Azııadan jańa múshelermen keńeıtýdi qoldaıdy. Ǵalamdyq Ońtústik elderiniń daýystary beıbitshilik pen qaýipsizdik máselelerin sheshýde mańyzdy ról atqarýy tıis. BRIKS bul úderiste negizgi ról atqara otyryp, ortasha derjavalar men damýshy ekonomıkalardyń jahandyq basqarý qurylymyndaǵy ókildigin kúsheıte alady. Qazaqstan BRIKS-ti jahandyq progrestiń qozǵaýshy kúshteriniń biri retinde qarastyrady», - dep atap ótti Toqaev.
Al Reseı prezıdenti Vladımır Pýtınniń BRIKS jumysyna Qazaqstannyń belsendi aralasatynyna úmiti zor.
«Qurmetti Prezıdent myrza, siz BRIKS-tiń damýyna nazar aýdaryp, oǵan joǵary baǵa berdińiz, sondaı-aq, elderińizdegi saýda aınalymynyń 50%-y BRIKS elderine tıesili ekenin atap óttińiz. Bul bizdiń ózara is-qımylymyzdyń naqty mańyzdy quramdas bóligi. Árıne, logıstıka da mańyzdy. Biz muny túsinemiz jáne oǵan úlken mán beremiz. Biz birlesken jumysymyzǵa belsendi qatysady dep úmittenemiz», – dedi Pýtın BRIKS+/aýtrıch formatyndaǵy BRIKS sammıtiniń qorytyndy otyrysynda.
Eske sala keteıik, Qazaqstan prezıdenti BRIKS sammıtine qatysý úshin Qazanǵa saparlady. Osy qarsańda Qazaqstannyń jaqyn arada bul uıymǵa qosylýǵa nıettenbeıtini aıtyldy. Eldegi sarapshylar bul málimdemeni ártúrli qabyldady.
