Premer-ministr Oljas Bektenov basqarǧan Ükımet taraidy, dep habarlaidy "Adyrna" ūlttyq portaly.
Ükımet basşysy 2024 jylǧy 6 aqpanda premer-ministr qyzmetıne taǧaiyndalǧan. Sodan berı Oljas Bektenovtıŋ alǧaşqy mındetterınıŋ qatarynda ekonomikany jandandyru, biudjet qarajatyn tiımdı paidalanu, investisiia tartu jäne infraqūrylym mäselelerın şeşu boldy. Onyŋ Ükımetı jūmys ıstegen kezeŋde 2024 jyly köktemdegı alapat su tasqyny boldy. Bırneşe öŋırde tötenşe jaǧdai jariialanyp, myŋdaǧan tūrǧyn evakuasiialandy. Keiın zardap şekken azamattarǧa tūrǧyn üi beru jäne ötemaqy töleu jūmystary jürgızıldı.
Sol jyldyŋ 6 qazanynda Qazaqstanda AES salu mäselesı boiynşa respublikalyq referendum öttı. Dauys beruge qatysqandardyŋ 71,12%-y atom elektr stansiiasyn saludy qoldady. Osydan keiın atom energetikasy jobasyn ıske asyru boiynşa jūmystar jalǧasty.
Ükımet jūmysynda maŋyzdy özgerısterdıŋ bırı jaŋa Salyq kodeksınıŋ qabyldanuy boldy. Qūjatqa 2025 jyly 18 şıldede qol qoiylyp, 2026 jylǧy 1 qaŋtardan bastap küşıne endı. Onyŋ aiasynda qosylǧan qūn salyǧynyŋ bazalyq mölşerlemesı 12%-dan 16%-ǧa deiın köterılıp, jeke tabys salyǧynyŋ progressivtı şkalasy engızıldı.
Sonymen qatar, 2025 jyly Qazaqstan ekonomikasy 6,5%-ǧa östı. Alaida jyl qorytyndysynda infliasiia 12,3%-dy qūrap, baǧanyŋ ösuı Ükımet üşın negızgı mäselelerdıŋ bırıne ainaldy.
Oljas Bektenov Ükımetınıŋ jūmysy kezeŋınde 2026 jylǧy 15 nauryzda jaŋa Konstitusiia qabyldanyp, 1 şıldeden bastap küşıne endı. Sonyŋ nätijesınde Parlamenttıŋ ornyna bır palataly Qūryltai qūryldy, sondai-aq Vise-prezident instituty engızıldı.
Al 23 tamyzda jaŋa Konstitusiiaǧa säikes Qūryltaidyŋ alǧaşqy sailauy öttı. 145 deputattan tūratyn jaŋa zaŋ şyǧaruşy organnyŋ sailau qorytyndylary 24 tamyzda jariialandy.
Aita keteiık, Ükımettıŋ jūmysy toqtaityny turaly Prezident Toqaev 23 tamyz künı sailauda dauys bergennen soŋ jurnalistermen ötken brifingte aitqan.
"Dünie jüzındegı bäsekelestık küşeiıp keledı. Naryqtyŋ syn-qaterlerıne mūqiiat nazar audaryp, eŋ bastysy, tiıstı deŋgeide tötep beruımız kerek. Älbette, Ükımet otstavkaǧa ketedı. Ükımet qūramynda bırqatar özgerıs bolady. Aşyǧyn aitqanda, däl bügın Ükımet jūmysyna alaŋdauǧa nemese oǧan syn aituǧa qandai da bır negız joq. Ministrler de, Ükımet jetekşısı de qoldan kelgenşe mındetterın atqaryp jatyr. Bıraq kadrlyq özgerıster ärdaiym bolady. Öitkenı būl Ükımettıŋ jūmysyna qan jügırtedı", – dedı Memleket basşysy.
Aituynşa, mäsele bıreudı ornynan bosatuda emes.
"Men jai syltaumen jūmystan şyǧaruǧa qaşanda qarsymyn. Äsırese, qazırgı tılmen aitqanda, mediadaǧy kontent nemese mazmūn üşın auys-tüiıs jasaudyŋ qajetı joq. Kadrlyq şeşım şyn mänınde jūmysqa tyŋ serpın beruı kerek. Bärımız aityp jürgen jaŋǧyru üderısı üzdıksız jürgızıluge tiıs. Öitkenı būl kürdelı prosestı alǧa jetelep otyru qajet. Būl ıste Ükımet maŋyzdy röl atqarady", – degen Prezident Qasym-Jomart Toqaev.
