Qaraly habardy Jazýshylar odaǵynyń telegram arnasy jazdy.
"Ardaqty aǵaıyn! Belgili qalamger, etnograf-jazýshy, qasıetti Quran Kárimdi qazaq tiline aýdarǵan tárjimashy Ýaqap Qydyrhanuly aǵamyz keshe 91-ge qaraǵan jasynda dúnıeden ozdy", – delingen estirtýde.
Marqummen qoshtasý erteń, 27 maýsymda saǵat 10:00-de Almatydaǵy Qazaqstan Jazýshylar odaǵynda (Abylaı han dańǵyly, 105) ótetini habarlanǵan.
"Odaq ǵımaratynyń aldynda janazasy shyǵarylady. Saǵat 13:00-de "Juldyz" restoranynda (Gogol kóshesi, 40) janaza asy berilmek. Qadirli qalamgerler, janazaǵa qatysyńyzdar!" – delingen Odaq habarynda.
Ýaqap Qydyrhanuly – 1932 jyly 23 jeltoqsanda dúnıege kelgen. Qazaq memlekettik ýnıversıtetiniń jýrnalıstıka fakýltetin bitirgen soń "Lenınshil jas" (qazirgi "Jas Alash") gazetinde ádebı qyzmetker, Shyǵys Qazaqstan oblystyq "Kommýnızm týy" gazetinde, Qazaq radıosynda, "Soıalıstik Qazaqstan" (qazirgi "Egemen Qazaqstan") gazetinde bólim meńgerýshisi, elaralyq "Shalqar" gazetinde bas redaktor qyzmetin atqarǵan.
Bir top óleńi 1960 jyly jas aqyndardyń "Jyrǵa sapar" jınaǵynda, "Ant" povesi "Jol basy" atty ujymdyq jınaqta jaryq kórdi. "Shańqaı tús", "Tań nury", "Tasqaınat", "Altyn aı" atty áńgime-povester jınaǵynyń, birneshe derekti kitapshalardyń avtory. 1991 jyly Quran Kárimniń túsindirmeli-maǵynalyq tárjimasyn jasady. Onyń jetildirilgen, jańa nusqasy 2002 jyly qaıta basylyp, tegin taratylǵan.
Qazaqstan Jýrnalıster odaǵy syılyǵynyń úsh márte ıegeri. Qazaqstannyń eńbek sińirgen qyzmetkeri, halyqaralyq "Alash" ádebı syılyǵynyń laýreaty.
