Jelide Paıǵambardy túsimde kórdim degen Nazerke esimdi qyzdyń hıdjabyn sheship tastap, túrli boqaýyz sóılegen vıdeosy tarady, dep habarlaıdy “Adyrna” ulttyq portaly.
Birneshe aı buryn Paıǵambardy túsimde kórdim dep, óziniń dinge kelgen jolyn, oramaly úshin ata-anasyna qarsy shyqqanyn aıtqan Nazerke esimdi qyzdyń hıdjabyn sheshkeni tarady.
Boıjetken mundaı sheshimge UQK ókilderiniń kómegimen kelgenin aıtqan.
Tikeleı efırde otyrǵan 500-den astam kisiniń bir bóligi “satqyn, dinińdi sattyń!”, “seniki haıp boldy”, “musylman emessiń”, “tozaqta janasyń”, “ońbaǵan, jezókshesiń”, “dinge kúıe jaqpa”, “buǵan jyn kirgen”, “kápir” dep pikir jazsa, endi birileri botadaı bozdap otyrǵan qyzdyń telefon nómirin surap, “demalaıyq” degen maǵynada pikirin qarsha boratýda.
“Men árkimniń týlaǵyndaı ılenbeı, taza ómir súrý úshin, balalarymnyń júzi tómen bolmaýy úshin osy qadamǵa bardym. Imanym da, dinim de — júregimde. Men namysyn taptatpaǵan qazaqtyń qyzymyn. Osyny bilińizder! Eshkimniń ımany syrtqy kıimimen ólshenbeıdi” degen ol áıel retinde ózin basqalardyń túsinýin ótindi.
Esterińizge sala keteıik, buǵan deıin bıýtı-bloger Sánııa Ilııasovanyń da oramaldan bas tartqanyn jazǵan bolatynbyz.
