Qazaqstandyq "Evro Odaq" laqap atymen tanymal trevel-bloger Erhat Qusaınov Túrkimenstanda ustaldy, dep habarlaıdy "Adyrna" ulttyq portaly.
Bul aqparatty QR Syrtqy ister mınıstrligi rastady.
Blogerdiń ınstagram paraqshasyndaǵy málimetke sáıkes, ol saıahatta júrgen. "Evro Odaq" Almatydan Abý-Dabıge avtostoppen jetýdi josparlaǵan. Sońǵy jazbasy 17 qarashada jarııalanǵan, onda Erhat Samarqandta túsken sýretin bólisken. Sol ýaqyttan beri ol baılanysqa shyqpaǵan.
Jazbanyń astynda dostary men jazylýshylary alańdap, blogerge "qaıdasyń?" degen suraqtardy jaýdyrǵan.
Erhattyń bir dosy búgin blogerdiń tabylǵanyn, biraq "baılanysqa shyǵý múmkindigi joq ekenin" aıtty.
"Biz biletin jalǵyz nárse – onyń aman jáne Túrkimenstanda ekendigi. Memlekettik organdarmen máseleler týyndaǵan bolýy múmkin, bálkim vızasy nemese qujattary sebep bolǵan shyǵar, ázirge túsiniksiz", – dep jazdy bloger Dıas Beıbituly ınstagram áleýmettik jelisinde.
QR SIM-niń resmı ókili Aıbek Smadııarov blogerdiń ustalýyna qatysty málimettermen bólisti.
"Ol túrkimen shekarashylary tarapynan Ózbekstan men Túrkimenstannyń memlekettik shekarasyn zańsyz kesip ótkeni úshin ustaldy. Bizdiń elshilik bul másele týraly habardar, konsýl ustalǵan azamatpen kezdesý surady", – dedi ol.
