El ishinde otbasyny uıytyp, urpaq tárbıelep qoǵamnyń damýyna úles qosyp jatqan qarapaıym adamdardyń orny bólek. Olardyń ár kúni marapatqa laıyq.
Jan jylýy, sheksiz mahabbat ıesine aınalǵan olar ystyq uıasymen qosa súıikti mamandyq ıeleri. Meıli aýylda tursyn, meıli qalada tursyn – olardyń qoǵamda alar orny bólek.
ShARShAMAITYN TIGINShI
Tiginshi mamandyǵyn ıgergen Quttyqyz Tastanova – alty balanyń anasy. Kúnine eki mezgil sıyr saýyp, qurt-maı taǵy basqa túrli sút ónimderin ózi qoldan óńdep, osy arqyly kishigirim bıznesinde dóńgeletip otyrǵan jaıy bar.
Onymen qosa Quttyqyz hanym úıine jaqyn ornalasqan tis emhanasynda sanıtar qyzmetin atqarady.
Qalǵan ýaqytyn úıinde balalarynyń janynda ótkizedi, olarǵa as-aýqatyn berip, sabaqtaryn baqylaıdy. Bos ýaqyt taýyp tiginshilikpen de aınalysady. Keshke qaraı dastarqan basyna barlyq otbasy músheleri jınalǵanda, «osyndaı jan balqytar jyly ortada otyrǵanda, barlyq sharshaýym basylady» deıdi ol
URPAQTARDY JALǴASTYRǴAN ULY USTAZ
Janar Azhodjaeva 37 jyl mektepte aıaýly ustaz bolyp qyzmet atqarǵan. Qazir zeınet jasyna shyǵyp, tátti nemerelerin baǵady.
- Men bala kezimde ártis de, bıshi de, jýrnalıst te bolǵym kelgen. Buryn telefon joq, teledıdar az kóretinbiz. Sodan shyǵar, kóp ártisterdiń sýretterin jınaıtynbyz. Ásirese, bıshi Shara Jıenqulovanyń bılep turǵan sýretteri kóp bolatyn. Biraq, oqý bitirer kezimde, men muǵalim bolatynymdy naqty bildim, ustaz mamandyǵyn tańdadym. Oǵan sebep bolǵan – ákem jáne orys tili men fızıka páninen beretin ustazdarym. Solardyń pánge qyzyǵýshylyq tanytý qabiletine qarap, oqýshylardyń tilin taýyp, aqyl aıtyp, keńes bergeni, qarapaıymdylyǵy, bilimdiligi, adamgershiligi osynyń bári maǵan úlgi boldy! Ákem “Muǵalim bolsań, jaman adam bolmaısyń” deıtin. Mektepte 37 jyl ustaz bolyp istedim. Aldymnan myńdaǵan oqýshylar ótti. Bári de ár túrli minezdi, bir-birine uqsamaıdy. Oqýshylarymdy jaqsy kóretinmin. Bilim, tárbıe berýden sharshamaıtynmyn. Oqýshylarym meni kórse amandasyp, jaǵdaıymdy surap turady. Zeınetke shyqsam da habarlasyp, izdep, jazyp turady. Búginde oqýshylarym jaqsy jumys atqaryp júr, turmys quryp, otbasyly boldy, balalary da bar. Instagram jelisinen kórse mindetti túrde jazady, men bolsam, marqaıyp, máz bolamyn, - deıdi ol.
Janar hanym qazirgi urpaqtyń óz ereksheligi bar dep sıpattaıdy.
- Qazirgi balalar aqyldy, pysyq, erkin sóıleı alady, alǵyr, uıalshaq emes, bir sózben aıtqanda - tulǵa! Árıne bizdiń balalyq shaǵymyzben salystyrýǵa bolmaıdy. Qazirgi zamannyń balalary óte damyǵan, múmkindigi kóp. Biz jas kezimizde dalada óskenbiz, oıyn oınap, dostarymyzben kezdesip áńgime aıtatynbyz, kitap kóp oqıtynbyz, kıno, teatrǵa qyzyǵýshylyq qatty bolatyn. Úıde áke-sheshemizben, ápke-aǵalarymyzben qyzyqty áńgime aıtyp, ájemiz ertegi aıtyp otyratyn. Ár túrli oıyndar oınaıtynbyz. Al qazirgi balalarda qalaı? Telefonnan basyn almaıdy, áke-anasy da kóp ýaqytyn telefonda ótkizedi. Burynǵydaı qarym-qatynas jasap, ashyq áńgime aıtý joǵalyp bara jatqandaı... – deıdi Janar hanym.
JAS MAMANNYŃ JAN QÝANYShY
Emhanada meıirbıke qyzmetin atqaratyn jas maman Dınara Berdibaevanyń bul salada istep júrgenine 4 jyldan asqan. Bul mamandyqty tańdaýyna sebepker bolǵan ákesine sheksiz alǵysyn aıtyp, qazirgi kúni sonyń jemisin kórýde.
- Syrqat janyna medeý izdep kelgen adamdardyń emdelgennen keıingi jadyraǵan júzin kórý erekshe baqyt, - deıdi ol.
Ujymdaǵy áriptesterimen túrli merekelerde merekelik dastarqan jaıyp, kóńildi ýaqyt ótkizedi.
Bos ýaqytynyń kóp bola bermeıtinin aıtqan keıipkerimiz otbasynda analyq, kelindik qyzmetterdi de atqaratynyn aıtyp aǵynan jaryldy.
Aıaýly jar, meıirimdi ana, pysyq kelin bolyp júrgen Dınara búginde sheksiz baqytty ekenin aıtady.
KÁSIPTIŃ NÁSIBI
Malıka Tuıaqbaeva – Astana qalasynda túrli nan ónimderin shyǵaratyn jeke menshik zaýytta jumys jasaıdy. Ol bul jumysqa kelýine joldas qyzy sebep bolǵanyn aıtady. Bul jerde qurbysymen birge jumys jasap kele jatqanyna da 5 jyldyń júzi bolyp qalypty. Keıipkerimiz jumysy ózine qatty unaıtynyn jáne ony mahabbatpen oryndaıtynyn jetkizdi.
Ujymdastarynyń aýyzbirshiligi tamasha, jumysta óte kóńildi ýaqyt ótkizip, jumystyń qıyn sátterinde sezbeı qalatynyn aıtady. Jumys ýaqyty tańǵy 8-den keshki 20:00 ge deıin. Eki kún istep, eki kún demalǵan kúnderinde Malıka hanym táp-tátti nemerelerimen serýendegendi unatady eken.
ADAL EŃBEKTIŃ IESI
Uljamal Imanalıeva – mektepte ustaz. Balalardyń tilin taýyp, olarǵa bar bilgen bilimin úıretip júrgen jas maman bul salaǵa qalaı kelgenin aıtyp berdi.
- Men muǵalim bolýdy kishkentaı kúnimnen armandadym, sebebi alǵashqy ustazym óte keremet jany jaısań jan bolatyn. Sol kisideı bilimdi apaı bolǵym keldi. Sodan ınformatıka páninen pedagogıkalyq ınstıtýtty támamdap, Shymkent qalasynyń mektepterinen jumys qarastyrdym. 2020 jyldyń jaz aılarynda hr proesten vakansııa qaraǵan mektepterge ótinim tastap, testten ótip bir mekteptiń muǵalimi atandym. Mektepke birinshi kelgende áriptesterim men oqýshylar jaqsy qarsy aldy. Tez úırenisip kettim. Keıde mekteptiń bitpeıtin qaǵazdarynan sharshap ketetin kezderimiz bolady. Áıtse de meniń jumysym ózime qatty unaıdy. Balalarǵa bar bilgenimdi úıretip, sanasyna sińdirgim keledi, - deıdi Uljamal hanym.
Aıgúl Júsip,
«Adyrna» ulttyq portaly
