11 qazan kúni Astanada «Otandastar» forýmy ótedi, dep habarlaıdy «Adyrna» ulttyq portaly.
Astana aqshamynyń málimetine sáıkes, forýmǵa tek etnıkalyq qazaqtar ǵana emes, Qazaqstanda kindik qany tamǵan azamattar men olardyń urpaqtaryn qamtyǵan 300-den artyq qonaq shaqyrylǵan. Olardyń qatarynda memleket qaıratkerleri, depýtattar, sheteldegi qazaqtarmen jıi qarym-qatynas ornatyp, olardyń talap-tilekterin bılikke jetkizýge kúsh salyp júrgen azamattar, shetelden kóship kelgen aqyn-jazýshy, ǵalymdar, saıasat, mádenıet, ǵylym, bilim, medıa, bıznes salasynyń ókilderi bar.
Atalǵan forýmnyń maqsaty – sheteldegi qazaq uıymdarymen yntymaqtastyqty talqylaý; elimizdiń jańa kezeńdegi memlekettik saıasat pen saıası-ekonomıkalyq reformalarymen, sondaı-aq ulttyq rýhanııatqa qatysty zamanaýı trendtermen tanystyrý; sheteldegi qazaqtardy qoldaýda Qazaqstannyń júrgizip otyrǵan saıasaty; sheteldegi qazaq jastaryna Qazaqstanda sapaly bilim alýda jáne óz qabiletterin iske asyrýda, sondaı-aq elge kóship keletin qandastarǵa memleket tarapynan qabyldanyp jatqan qoldaý sharalary týraly aqparattandyrý.
Astanada ótetin bul forýmda shet elderdegi qandastarǵa kreatıvtik ındýstrııa, medıa, mádenıet, kásipkerlik salalaryndaǵy tyń trendter, elimizdiń ınvestıııalyq ahýaly men sony bastamalary tanystyrylmaq. Shet elderdegi qazaq uıymdarynyń basshylary men otandyq túrli sala ókilderine bir-birimen baılanys ornatýyna, tájirıbe almasýyna jaǵdaı jasalmaq. Sonymen qatar «Otandastar qory» KE AQ jańa jobalarynyń tusaýkeseri ótip, «Uly dala» jobasy aıasynda 11 kitaptyń tusaýkeser rásimin ótkizý sharalary josparlanyp otyr.
Sondaı-aq Qazaqstannan bólek, bıyl«Otandastar qory» shetelde birneshe shara ótkizgen. Onyń ishinde Germanııanyń Kıoln qalasynda Eýropa qazaqtarynyń kishi quryltaıy ótken. Bul quryltaıǵa Qazaqstannan qolóner sheberleri, ulttyq sport uıymdarynyń ókilderi barǵan. Maýsym aıynda Reseıdiń Máskeý qalasynda Reseı qazaq uıymdary belsendileriniń basqosýy ótse, shilde aıynda Mońǵolııada kishi quryltaı bolǵan. Aldaǵy ýaqytta Qytaıda shyǵarmashylyq formatta is-sharalar ótkizý josparlanýda.
Osy tusta «Otandastar qory» KE AQ prezıdenti Abzal Saparbekuly qor jumysyn jetildirý jolynda atqarý kerek jumystardy atap ótti.
«Elimizdiń keıbir zańdarynda sheteldegi qazaqtardy qoldaý boıynsha birqatar baptar, tarmaqtar engizilgen. Biraq sheteldegi qazaqtarmen bolǵan baılanysty birizdendirý úshin sheteldegi qazaq dıasporalaryna qatysty arnaýly zań nemese qujat qabyldaý kerek. Bul másele de memlekettiń nazarynda, aldaǵy ýaqytta sheshimin tapsa, bizdiń shetel qazaqtarymen jumys jasaýymyzǵa asa tıimdi bolar edi. Osydan buryn Úkimettiń etnıkalyq qazaqtardy qoldaýǵa baılanysty is-sharalar jospary qabyldanǵan bolatyn, onyń 2022 jyly merzimi bitti. Qazirgi tańda jańa is-sharalar jospary qarastyrylý ústinde, bıyl jyl sońyna deıin qabyldanady degen oıdamyz», - deıdi qor prezıdenti.
«Adyrna» ulttyq portaly
