Otandy qorǵaý, súıý – otbasynan bastalady jáne árbir azamattyń qasıetti paryzy. Qazirgi tańda áskerı qyzmetti mindeti dep biletin, Otanyn qorǵaýdy armandaıtyn jastardyń qatary az emes. Biraqta, osy jolda batyl qadam jasap, armany jolynda qıynshylyqtardan qaımyqpaǵandar ǵana naǵyz el qorǵany bolyp júr.
Áskerı ómirdi er balaǵa túsindirip, osy mindetke baýlyp, qaırap ósirýde ákeniń orny erekshe. Halqymyzdyń «Áke – asqar taý» dep aıtýy da sol ákeniń otbasyndaǵy orny men qurmetine oraı bolsa kerek. Áke isin jalǵastyryp, aıtqandaryn qurmettep oryndaý bala úshin paryz. Áke armanyn asqaqtatyp, oryndaı almaǵan isterin jalǵastyrýshy azamattar retinde egiz leıtenant Aman men Esen Bısembaılar týraly aıtýǵa bolady.
Aman men Esen Aqtóbe qalasynda jumysshylar otbasynda dúnıege kelgen. Analary esepshi mamandyǵy boıynsha jumys jasap keledi. Ákeleri Sabyrjan óz ýaqytynda Talǵat Bıgeldınov atyndaǵy Áýe qorǵanys kúshteriniń áskerı ınstıtýtyna oqýǵa túsýge baǵyn synap, belgili sebeptermen túse almaǵan. Áskerı ushqysh bolýdy basty maqsat etken Sabyrjan 2012 jyly syrqattanyp dúnıeden ótti. Áke armanyn júzege asyrýǵa bel býǵan egizder mektep qabyrǵasyn támámdaǵan soń Keńes odaǵynyń eki márte batyry Talǵat Bıgeldınov atyndaǵy Áýe qorǵanys kúshteriniń áskerı ınstıtýtyna oqýǵa túsýge sheshim qabyldaıdy.
Atalǵan ınstıtýtqa túsý erejelerine saı tekseristerden, oqý pánderi men dene shynyqtyrý daıyndyǵy synaqtarynan jaqsy nátıje kórsetken egizder 2017 jyly Aqtóbe qalasyndaǵy atalǵan áskerı ınstıtýtyna oqýǵa qabyldanady. Bala kezden sportqa áýes Aman men Esen áskerı ómirdiń alǵashqy baspaldaǵy bolyp sanalatyn ınstıtýt qabyrǵasynda komandırler men serjanttardyń tapsyrmalaryn joǵary nátıjede oryndap, birneshe ret basshylyq tarapynan alǵystarǵa ıe boldy. Sporttyń fýtbol túrin jandaryna serik etken olar birneshe saıystarda top jardy.
2021 jyly joǵary oqý ornyn bitirip, «leıtenant» shenin alǵan jas ushqysh Aqtaý garnızonyndaǵy 30153 áskerı bóliminde qyzmetterin jalǵastyrýda.
Leıtenant Aman Bısembaı osy bólimde tehnıkalyq paıdalaný bóliminiń ushaqty reglamentteý jáne jóndeý tobynyń avıaııalyq aǵa tehnıgi bolsa, al leıtenant Esen Bısembaı tehnıkalyq paıdalaný bóliminiń avıaııalyq qozǵaltqyshtardy reglamentteý jáne jóndeý tobynyń avıaııalyq aǵa tehnıgi.
Antyna adal, sertine berik, áke armanyn oryndaı bilgen Aman men Esen elimizdegi bolashaq Otan qorǵaýshy jastarymyzǵa úlgi bolary anyq.
Muhıt Qonarov
Qyzylorda garnızony baspasóz qyzmetiniń bastyǵy, leıtenant
