Bügın, 25 tamyzdan bastap Qazaqstanda elektrlı samokattar men qozǧaltqyşy bar velosipedterdı paidalanu tärtıbı özgeredı, dep habarlaidy "Adyrna" tılşısı.
Tiıstı özgerıster «Jol jürısı turaly» zaŋǧa engızılgen tüzetulerge bailanysty küşıne endı. Endı jeke jäne jalǧa alynǧan elektrosamokattarmen tek velojolaqta nemese joldyŋ şetımen jüruge rūqsat etıledı. Jolǧa şyǧatyn samokat jürgızuşısınde şlem jäne kez kelgen sanattaǧy jürgızuşı kuälıgı boluy qajet. Qaraŋǧy uaqytta jaryq şaǧylystyratyn jilet nemese arnaiy kiım kiiu mındettı.
Al giroskuter, sigvei, elektromotoskeitbord, monodöŋgelek sekıldı şaǧyn elektr kölık qūraldarymen jaiau jürgınşıler jolynda jüruge bolady. Samokattardyŋ trotuarmen jüruıne jergılıktı atqaruşy organ arnaiy rūqsat bere alady. Sonymen qatar 25 tamyzdan bastap qozǧaltqyşy bar, iaǧni elektr nemese benzin qozǧaltqyşymen jabdyqtalǧan velosipedter mopedterge teŋestırıledı. Sondyqtan olardy trotuar men velojolaqta jürgızuge bolmaidy. Mūndai kölıkter memlekettık tırkeuden ötıp, nömır aluy jäne mındettı saqtandyryluy tiıs. Basqaru üşın A1 sanatyndaǧy jürgızuşı kuälıgı qajet.
