Reseı bas prokýratýrasy Musylmandar dinı basqarmasynyń 4 áıel alý týraly pátýasyn Otbasy jáne neke týraly zańǵa qaıshy keledi dep tapty. Bul týraly Reseı basylymdary jarııalady, dep habarlaıdy “Adyrna” ulttyq portaly.
«Musylmandar dinı basqarmasy elde kóp áıel alýǵa ruqsat beretin «Reseı musylman qaýymyndaǵy kóp áıel alý máseleleri» týraly pátýasyn keri qaıtaryp aldy», – dep jazǵan basylymdar.
Buqaralyq aqparat quraldarynyń habarlaýynsha, bas prokýratýra Reseı musylmandary dinı basqarmasynyń tóraǵasyna kóp áıel alýǵa ruqsat beretin teologııalyq qorytyndysyna baılanysty usynys bergen. Prokýratýra zańdy nekede turǵan adamnyń basqa adammen nekelesýine tyıym salynatynyn túsindirgen. Reseı Federaııasynyń Otbasy kodeksiniń 14-babyna sáıkes, «kem degende bir adam basqa tirkelgen nekede turǵan adamdar» arasynda jańa neke tirkeýge jol berilmeıdi.
Bas prokýratýranyń bul usynysynan keıin, dinı basqarma pátýasyn keri qaıtaryp alǵan.
Aıta keteıik, 20 jeltoqsan kúni Reseı musylmandarynyń dinı basqarmasynyń orynbasary, Máskeý qalasynyń múftıi Eldar Alıaýtdınov musylmandarǵa tórt áıelge deıin dinı neke qııýǵa ruqsat beriletini jóninde pátýa shyǵarylǵanyn málimdegen.
Alaıda dinı basqarmanyń bul sheshimin Adam quqyqtary jónindegi keńes músheleri synǵa alyp, «Reseı sharıǵat zańy boıynsha ómir súretin elge aınalmaýy kerek» degen qarsylyqtaryn jetkizgen.
