Mäjılıste üş jarym jylǧa juyq qyzmet atqarǧan deputat Baqytjan Bazarbek Parlamenttegı jūmysyn aiaqtady. Būl turaly ol äleumettık jelıdegı paraqşasynda jazdy, dep habrlaidy "Adyrna".
«Parlamenttegı üş jarym jyldyq qyzmetımde elıme jäne halqyma adal ärı prinsiptı türde qyzmet etuge tyrystym. Mäjılıstıŋ belsendı deputattarynyŋ bırıne ainaldym. Eger halyqtyŋ senımı men qūrmetıne ie bola alsam, demek, jürıp ötken jolym zaia ketpegenı», – dep jazdy ol.
Bazarbek aldaǧy uaqytta ömırınıŋ jaŋa kezeŋı bastalatynyn aityp, kez kelgen özgerıs jaŋa mümkındıkterge jol aşatynyn jetkızdı. Sondai-aq osy uaqytqa deiın özıne qoldau körsetıp, senım bıldırgen azamattarǧa alǧysyn bıldırdı.
«Endı men erkınmın. Ömırımde jaŋa kezeŋ bastalady. Bır esık jabylsa, ekınşısı aşylady», – dedı deputat.
Baqytjan Bazarbek Mäjılıstegı qyzmetı barysynda jer zaŋnamasy, qala qūrylysy jäne sybailas jemqorlyqqa qarsy küres mäselelerın belsendı köterdı. Ol Almaty men Astanadaǧy beibereket qūrylysqa, seismikalyq qauıptı aimaqtar men tau bökterındegı zaŋsyz nysandardyŋ salynuyna qarsy pıkır bıldırıp, olardy toqtatudy talap ettı.
Sonymen qatar ırı latifundister men oligarhtardyŋ ielıgıne zaŋsyz ötken jaiylymdyq jäne auyl şaruaşylyǧy jerlerın memleketke qaitaru mäselesın tūraqty köterıp, osy baǧyttaǧy zaŋnamalyq özgerısterdıŋ qabyldanuyna bastamaşy boldy.
Äleumettık jelı qoldanuşylary Mäjılıstegı belsendı ärı prinsipşıl deputattardyŋ bırı sanalatyn Baqytjan Bazarbektıŋ jaŋa qūramnan tys qalǧanyna qatysty türlı pıkır bıldırude.
