ەكونوميست: ء"بىر دە ءبىر اكىم ءوزىنىڭ وبلىسىن دامىتا الىپ وتىرعان جوق"

9867
Adyrna.kz Telegram

"Integrity Astana" كوممەرتسيالىق ەمەس ۇيىمىنىڭ جەتەكشىسى جانات نۇرعاليەۆ ءوز مىندەتىن اتقارا الماي وتىرعان، لاۋازىمىن بوساتۋى ءتيىس ءۇش اكىمدى اتادى. ولار — شىعىس قازاقستان وبلىسىنىڭ اكىمى دانيال احمەتوۆ، جامبىل وبلىسىنىڭ اكىمى بەردىبەك ساپارباەۆ جانە نۇر-سۇلتان قالاسىنىڭ اكىمى التاي كولگىنوۆ دەپ حابارلايدى "ادىرنا" ۇلتتىق پورتالى "ulysmedia.kz" سايتىنا سىلتەمە جاساپ.

"ماسەلەن، دانيال احمەتوۆ ايماقتى دامىتۋعا ەشقانداي كوڭىل بولگەن ەمەس. وڭىردەگى ازاماتتىق قوعامدى دامىتۋعا مۇمكىندىك بولماي جاتىر. "قاشان احمەتوۆ كەتەدى؟" دەپ جۇرت ەلەڭدەپ كۇتىپ وتىر. جەمقورلىق كۇن سايىن دەندەپ بارادى", – دەگەن ول زەينەت جاسىنداعى باسشىلار ورىندارىن بوساتۋى ءتيىس ەكەندىگىن، ەرىك-جىگەرى بار جاستارعا بارىنشا جول اشۋ كەرەكتىگىن العا تارتتى.

ونىڭ ايتۋىنشا، زەينەت جاسىنداعى بەردىبەك ساپارباەۆ تا ايماققا كوڭىل بولمەيتىندەردىڭ ءبىرى. جالپى، جامبىل وبلىسى عانا ەمەس ەلىمىزدىڭ بارلىق وڭىرىندە مەملەكەتتىك ساتىپ الۋ بويىنشا كوپتەگەن كەمشىلىكتەر بار. تاۋەلسىز زەرتتەۋشى الەۋمەتتىك سالانى قارجىلاندىرۋدا تەپە-تەڭدىكتىڭ ساقتالماۋىنا قاتىستى جەمقورلىق قاۋپى بار بىرنەشە كەيستەردى انىقتاعان.

"مىسالى، نۇر-سۇلتان اكىمدىگى ات سپورتى كەشەنىن جەكە قۇرىلىس سالۋشىدان ساتىپ الۋ ءۇشىن بيۋدجەتتەن 6 ميلليارد 243 ميلليون تەڭگە ءبولىپ وتىر. بيىل دەنساۋلىق ساقتاۋ سالاسىنداعى قۇرلىستارعا مۇلدە قارجى قاراستىرىلماعان، تۇرعىن ءۇي-كوممۋنالدىق شارۋاشىلىعى سياقتى پايدا كورۋگە بولاتىن سالالارعا باسىمدىق بەرىلگەن. ال اشىقتىعى كورىنىپ تۇراتىن ءبىلىم، دەنساۋلىق ساقتاۋ سالاسى نازاردان شەت قالعان. سوندىقتان جەمقورلىق قاۋپى بايقالادى. كولگىنوۆ ارنايى توپتىڭ قىزىعۋشىلىعى ءۇشىن عانا جۇمىس ىستەيدى، قوعامدىق پىكىرگە قۇلاق اسقان ەمەس. قوعامدىق ورىنداردا ۇلكەن قۇرلىستاردىڭ ءجۇرىپ جاتقانىنا ءوزىمىز كۋامىز. جوعارىدا ايتقانىمداي بۇرىننان ىستەپ كەلە جاتقان جاسى ۇلكەن زەينەتكەرلەرگە دەمالىس كەرەك", – دەپ تۇيىندەدى ول.

ال ەكونوميست ايدار الىباەۆتىڭ رەيتينگى بويىنشا ءوڭىر باسشىلارىنىڭ اراسىندا ەشقايسىسى وبلىستى دامىتا الماي وتىر. ول ونىڭ بىردەن ءبىر سەبەبى رەتىندە اكىمدەردىڭ حالىق مۇددەسىنەن گورى، جەكە بيزنەس قىزىعۋشىلىعى ءۇشىن جۇمىس ىستەۋگە بەيىلدى ەكەنىن اتادى.

ء"بىر دە ءبىر اكىم ءوزىنىڭ وبلىسىن دامىتا الىپ وتىرعان جوق. تۇرعىندار ءۇشىن ەكونوميكالىق احۋالدى جاقسارتۋعا مۇددەلى ەمەس. جالپى العاندا اكىمدەر ءوز قىزىعۋشىلىقتارى ءۇشىن عانا جۇمىس ىستەپ كەلەدى، وزدەرىن جارنامالايدى. بيزنەستە وتىرعان تۋعان-تۋىستارى ءۇشىن تۇسىنىكسىز باعدارلامالاردى شىعارادى", – دەيدى ساراپشى.

سونداي-اق، ونىڭ ايتۋىنشا جاپپاي ەرەۋىلدەن سوڭعى ۇكىمەتتەگى اۋىس-ءتۇيىس حالىققا تاڭداۋ جاساۋ قۇقىعىن بەرۋدى كوزدەيتىن ماڭىزدى بەتبۇرىس دەپ ايتۋعا ەرتە. ال كەشەگى جاعدايدان سوڭ بيلىكتىڭ قازىرگى مىندەتى – ەلدەگى جاعدايدى قالاي دا قالپىنا كەلتىرۋ. سوندىقتان ولار كەز-كەلگەن ۋادە بەرۋگە دايىن. ال الماتىنى بەلگىسىز ارانداتۋشىلار قيراتىپ، ورتكە وراپ جاتقان كەزدە قالا باسشىسى رەتىندە ءبىر اۋىز ءۇن قاتپاي جوعالىپ كەتىپ، ارتىنان تابىلعان باقىتجان ساعىنتاەۆ تا رەيتينگى تومەن اكىمدەردىڭ قاتارىندا.

"الماتى اكىمى بولسا الماتىلىقتاردى ابدەن تىعىرىققا تىرەپ بولدى. بوس ورىن كورىنسە بولدى 9 قاباتتى ءۇي سالادى. ءومىر ءسۇرۋ مۇمكىن بولماي بارادى. ءار وبلىس بويىنشا وسىنداي مىسالداردى كوپتەپ كەلتىرە بەرۋگە بولادى. بوس جەرى كوپ قوستاناي، پاۆلودار، سولتۇستىك وڭىرلەردىڭ اكىمدەرى دە ءدال وسىلاي تۋعان-تۋىستارىنىڭ بيزنەسىن دامىتۋعا جۇمىس ىستەپ وتىر. سوندىقتان حالىق مۇددەسى ءۇشىن جۇمىس ىستەپ وتىر دەپ ءبىر اكىمدى دە ايتا المايمىن. قازىرگى پرەمەر-ءمينيستردىڭ ورنىنا كەلگەن ءاليحان سمايلوۆتىڭ دا ماميننەن وزىپ تۇرعان ەشتەڭەسى جوق. ال حالىققا وبلىس اكىمدەرىن وزدەرى سايلاۋ دەگەن مۇمكىندىكتى ازىرگە بەرمەيدى، بالكىم الدا بولاتىن شىعار. ولار ءۇشىن مۇنىڭ سالدارى وتە جامان. ەگەر قانداي دا ءبىر جاقسى اكىم كەلسە پرەزيدەنتكە باسقارۋ قيىنعا تۇسپەي مە، وعان مۇنىڭ نە كەرەگى بار", – دەدى ساراپشى.

 

پىكىرلەر