قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ قر ۇكىمەتى وتىرىسىندا مەملەكەت باسشىسىنىڭ وسى جىلعى 11 قاڭتاردا قر پارلامەنتى ءماجىلىسىنىڭ وتىرىسىندا ايتىلعان تاپسىرمالارى قالاي ىسكە اسىرىلاتىنى تۋرالى ايتىپ بەردى. بۇل تۋرالى ۆەدومستۆونىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ءوز ءسوزىنىڭ باسىندا سەرىك شاپكەنوۆ قر ەڭبەك جانە حالىقتى الەۋمەتتىك قورعاۋ مينيسترلىگى العا قويىلعان مىندەتتەردى ىسكە اسىرۋعا كىرىسكەنىن، ونىڭ ءبىرى «قر الەۋمەتتىك كودەكسىن ۋاقتىلى قابىلداۋ» بولىپ تابىلاتىنىن حابارلادى.
«قازىرگى ۋاقىتتا الەۋمەتتىك كودەكستىڭ جوباسىن ازىرلەۋ جۇرگىزىلۋدە، ونى 2022 جىلعى جەلتوقساندا پارلامەنت ءماجىلىسىنىڭ قاراۋىنا ەنگىزۋ جوسپارلانىپ وتىر.
الەۋمەتتىك كودەكستى قابىلداۋ: ازاماتتاردىڭ الەۋمەتتىك قۇقىقتارى مەن مىندەتتەرىن ءبىر جۇيەگە كەلتىرۋگە; مەملەكەتتىڭ، جۇمىس بەرۋشىلەر مەن قىزمەتكەرلەردىڭ الەۋمەتتىك سالاداعى مىندەتتەمەلەرى مەن جاۋاپكەرشىلىگىن ناقتىلاۋعا مۇمكىندىك بەرەدى.
الەۋمەتتىك كودەكستى قابىلداۋ حالىقتىڭ مەملەكەت جۇرگىزىپ وتىرعان ءادىل الەۋمەتتىك ساياساتتى ءتۇسىنۋىن جاقسارتادى جانە ءبىزدىڭ ازاماتتارىمىزدىڭ ءومىر ءسۇرۋ دەڭگەيىنىڭ ساپاسىن ارتتىرادى دەپ بولجانۋدا»، – دەدى مينيستر.
مەملەكەت باسشىسى سونداي-اق «ۇكىمەتكە «اتامەكەن» ۇكپ-مەن بىرلەسىپ، ەكى اي مەرزىمدە حالىقتىڭ تابىسىن ارتتىرۋ باعدارلاماسىن قابىلداۋدى» تاپسىردى.
«حالىقتىڭ تابىسىن ارتتىرۋ باعدارلاماسى بويىنشا بىرقاتار ۇسىنىستار بار.
ءبىرىنشى كەزەكتە بۇل جالپى تابىس پەن جۇمىسپەن قامتۋدى ارتتىرۋعا باعىتتالعان باستامالار.
جەكە قولداۋ شارالارىن: ماماندىق تاڭداۋعا، وقۋعا جانە جۇمىسقا ورنالاسۋعا كومەك كورسەتۋ ءۇشىن حالىقتىڭ الەۋمەتتىك وسال توپتارى مەن NEET ساناتىنداعى جاستاردى «ەرتە انىقتاۋ جۇيەسىن» ەنگىزۋ كوزدەلىپ وتىر. اقپاراتتىق جۇيەلەردىڭ كومەگىمەن ىسكە اسىرىلىپ جاتقان ۇلتتىق جوبالار شەڭبەرىندە جۇمىس ورىندارىن قۇرۋدى جانە جۇمىسقا ورنالاستىرۋدى باقىلاۋدى قامتاماسىز ەتۋ جوسپارلانۋدا. جۇمىسقا ورنالاسۋدا جاستارعا، اسىرەسە NEET ساناتىنا باسىمدىق بەرىلەتىن بولادى.
ەكىنشىدەن، «اتامەكەن» ۇكپ-مەن بىرلەسىپ، ءار اۋىلدىڭ ەرەكشەلىگىن ەسكەرە وتىرىپ، كاسىپكەرلىككە وقىتۋ، ونىمدەر مەن كورسەتىلەتىن قىزمەتتەردى ساتۋعا قولداۋ كورسەتۋ جانە جەڭىلدەتىلگەن كرەديتتەر مەن گرانتتاردى ءبولۋ شارالارى قاراستىرىلاتىن بولادى»، – دەدى سەرىك شاپكەنوۆ.
مينيستر حالىقتى جۇمىسپەن قامتۋ بويىنشا جۇمىس اياسىندا جاستاردىڭ جۇمىسپەن قامتىلۋىنا ەرەكشە كوڭىل بولەتىنىن اتاپ ءوتتى.
«قازىرگى ۋاقىتتا مينيسترلىك جاستاردى جۇمىسپەن قامتۋعا باعىتتالعان شارالاردى جۇزەگە اسىرۋدا – بۇل «جاستار پراكتيكاسى» جانە «العاشقى جۇمىس ورنى» جوبالارى. اتالعان جوبالاردى كۇشەيتۋ ءۇشىن جاستاردىڭ قاتىسۋ مەرزىمى مەن جالاقى مولشەرى ۇلعايتىلادى»، – دەدى سەرىك شاپكەنوۆ.
ءسوز سوڭىندا ول تۇراقتى جۇمىس ورىندارىن قۇرۋ شارتتارىنىڭ ءبىرى – كاسىپكەرلىكتى دامىتۋ بولىپ تابىلاتىنىن اتاپ ءوتتى.
«مەملەكەت باسشىسىنىڭ تاپسىرماسى بويىنشا جەكە ءىسىن دامىتۋعا ارنالعان گرانت مولشەرى 200-دەن 400 ايلىق ەسەپتىك كورسەتكىشكە دەيىن (612,6 مىڭنان 1,2 ملن تەڭگەگە دەيىن) ۇلعايتىلادى، بۇل ورايدا گرانت بەرىلەتىن بيزنەس جوبالاردىڭ تيىمدىلىگىن باعالاۋ كۇشەيتىلەتىن بولادى»، – دەپ تۇيىندەدى مينيستر.
«ادىرنا» ۇلتتىق پورتالى
