abai.kz رەداكتسياسىنا مەملەكەتتىك قايراتكەر يمانعالي تاسماعامبەتوۆتىڭ قازاقستاندىقتارعا ارنالعان ۇندەۋى كەلىپ ءتۇستى، دەپ حابارلايدى «ادىرنا» ءتىلشىسى.
«اعايىندار، باۋىرلار، ازاماتتار! وسىناۋ قاڭتاردىڭ قاھارلى كۇندەرى ەلىمىزدە، ونىڭ ىشىندە اينالايىن اق الماتىمىزدىڭ باسىنا تۇسكەن قارالى كۇندەرى ورىن العان دۇربەلەڭدە وزدەرىڭىزگە ءۇن قاتۋدى ازاماتتىق پارىزىم دەپ بىلەمىن.
وكىنىشكە وراي، وسى كۇندەرى قازا تاپقان ازاماتتار از ەمەس. ولاردىڭ وتباسىلارى مەن جاقىندارىنا قايعىرىپ كوڭىل ايتامىن. يماندارى جولداس بولسىن.
ءسوز جوق، ءبىزدىڭ ەل ەجەلدەن ەڭبەك پەن ەرلىكتى، جىگەر مەن ەرىكتى تۋ ەتكەن تەكتى حالىق. «باس كەسپەك بار بولسا دا، ءتىل كەسپەك جوق» دەپ ءوز تىلەگىن تىلىمەن، سوزىمەن جەتكىزگەن جۇرت. سوندىقتان دا بۇل كۇندەرى كەي وڭىرلەردە باستالعان شەرۋلەر بەيبىت سيپاتتا، ادىلەتتى تالاپپەن بولدى.
دەسە دە، ارنايى دايىندالعان ارانداتۋشىلار مەن سودىرلار جاعدايدى پايدالانىپ كەتتى.ناتيجەسىندە، «تاۋەلسىزدىكتىڭ تال بەسىگى» سانالاتىن الىپ شاھاردى قانتوگىستىڭ الاڭىنا اينالدىردى. بۇل جاي عانا قىلمىس ەمەس. بۇل جاۋىزدىق! وتانعا، تاۋەلسىزدىككە جاسالعان وپاسىزدىق! قاراپايىم ازاماتتارىمىزعا جاسالعان قاتىگەزدىك!
مۇندايدا ەل بولاشاعى ءۇشىن جاۋاپكەرشىلىكتىڭ اۋىر جۇگى مەملەكەت باسشىسىنىڭ موينىندا. ال ءدال قازىر پرەزيدەنت ءار ازاماتتىڭ، ءار وتباسىنىڭ، تۇتاس قوعام قاۋىپسىزدىگىنىڭ جالعىز كەپىلى!
وسى ورايدا، مەن بارشا قازاقستاندىقتاردى مەملەكەت باسشىسى قاسىم-جومارت توقاەۆقا قولداۋ كورسەتۋگە شاقىرامىن!
ءبىز قاي جەردە تۋىپ، قاي وڭىردە جۇرسەك تە ءبىر اتانىڭ بالاسىمىز. قارعا تامىر قازاقپىز!
مەن كۇشتى دە قۋاتتى، اسەم دە الەۋەتتى مەملەكەتتىڭ ەرتەڭىنە سەنەمىن!
امان بولايىق! ەل بىرلىگى مەن بەرەكەسىن ساقتايىق، اعايىن!»– دەدى ول.
«ادىرنا» ۇلتتىق پورتالى
