پرەزيدەنت قاسىم-جومارت توقاەۆ قحر توراعاسى سي تسزينپينگە قازاقستان مەن قىتاي اراسىندا ديپلوماتيالىق قارىم-قاتىناستاردىڭ ورناعانىنا 30 جىل تولۋىنا وراي قۇتتىقتاۋ حاتىن جولدادى، دەپ حابارلايدى "ادىرنا" ۇلتتىق پورتالى اقوردانىڭ باسپاسوز قىزمەتىنە سىلتەمە جاساپ.
مەملەكەت باسشىسى ەكى ەلدىڭ تاريحي تۇرعىدان قىسقا مەرزىم ىشىندە الەمدىك دەڭگەيدەگى ۇلگىلى مەملەكەتارالىق قاتىناس قالىپتاستىرعانىن اتاپ ءوتتى.
– بۇعان مەنىڭ 2019 جىلى ەلىڭىزگە جاساعان ساپارىم بارىسىندا ىنتىماقتاستىعىمىزدى ماڭگى جان-جاقتى ستراتەگيالىق ارىپتeستىككە كوتەرۋ تۋرالى جاريالاعانىمىز دالەل. بۇل تاريحي شەشىمىمىز تاتۋ كورشىلىك، ءوزارا سەنىم مەن قولداۋعا نەگىزدەلگەن تەڭ قۇقىلى قاتىناستار قۇرۋ باعىتىنداعى ەكى جاقتى كۇش-جىگەرىمىزدىڭ شارىقتاۋ شىڭى بولدى. اتاپ ايتقاندا، ورتاق شەكارامىزعا قاتىستى بارلىق ماسەلەلەردىڭ ءتۇيىنى تارقاپ، بۇگىندە ول دوستىق پەن بىرلىك كوپىرىنە اينالدى. وسى رەتتە، قازاقستان مەن قىتاي شەكاراسىنداعى وزەندەرگە قاتىستى كەلىسسوزدەردى جۋىق ارادا اياقتاۋ مەملەكەتارالىق ىقپالداستىق جىلناماسىنىڭ تاعى ءبىر جارقىن بەتى بولارى انىق، – دەدى قاسىم-جومارت توقاەۆ.
پرەزيدەنت مەملەكەتتەرىمىز اراسىنداعى ءوزارا تۇسىنىستىك رۋحىنداعى ساياسي احۋالدىڭ ساۋدا-ەكونوميكالىق جانە ينۆەستيتسيالىق باعىتتاعى قارقىندى ىنتىماقتاستىعىمىزدىڭ كەپىلى ەكەنىن ايتتى. وسىنداي ىقپالداستىقتىڭ ناتيجەسىندە كاسىپكەرلىك پەن حالىقتارىمىزدىڭ يگىلىگىنە باعىتتالعان كوپتەگەن بىرلەسكەن جوبا تابىستى جۇزەگە اسىرىلىپ كەلەدى.
– قازاقستان مەن قىتايدى مىڭداعان شاقىرىمعا سوزىلعان تەمىر جانە كولىك جولدارى، مۇناي جانە گاز قۇبىرلارى جالعاپ وتىرعانىن ەرەكشە اتاپ وتەمىن. وسى تۇرعىدان، «نۇرلى جول» ستراتەگياسى مەن «ءبىر بەلدەۋ، ءبىر جول» باستاماسىنىڭ نەگىزگى باعدارى سانالاتىن بۇل «تەمىر كەرۋەن» جىل سايىن تاراپتارعا كوپتەگەن وتانداستارىمىزدى، ميلليونداعان توننا جۇكتەردى جانە ميللياردتاعان تەكشە مەتر تابيعي گازدى تاسىمالداۋعا مۇمكىندىك بەرەدى، – دەدى مەملەكەت باسشىسى.
سونىمەن قاتار پرەزيدەنت ەكى ەل ۇكىمەتىنىڭ ورتاق مۇددەلەرىمىزدى ءساتتى ىلگەرىلەتۋدە، COVID-19 ىندەتىنىڭ سالدارىن جويۋدا قاجىرلى جۇمىس ىستەپ جاتقانىنا توقتالدى. قاسىم-جومارت توقاەۆتىڭ ايتۋىنشا، ەكىجاقتى ىنتىماقتاستىقتىڭ وركەندەۋىنە جانە ماڭگى جان-جاقتى ستراتەگيالىق ارىپتەستىكتى ودان ءارى تەرەڭدەتۋگە قوسىپ وتىرعان قحر توراعاسىنىڭ جەكە ۇلەسىن قازاقستاندا جوعارى باعالايدى. سونداي-اق مەملەكەت باسشىسى رەسمي جانە جۇمىس تارتىبىندە تۇراقتى بايلانىستاردى نىعايتۋدا بىرلەسە كۇش-جىگەر جۇمىلدىرۋعا ءاردايىم دايىن ەكەنىن جەتكىزدى.
قۇتتىقتاۋ سوڭىندا قاسىم-جومارت توقاەۆ سي ءتسزينپيننىڭ اسا جاۋاپتى قىزمەتىنە تولاعاي تابىس، ال دوستاس قىتاي حالقىنا مول ىرىس پەن قۇت-بەرەكە تىلەدى.
"ادىرنا" ۇلتتىق پورتالى
