Toqaev Sı zınpındi quttyqtady

6729
Adyrna.kz Telegram

Prezıdent Qasym-Jomart Toqaev QHR Tóraǵasy Sı zınpınge Qazaqstan men Qytaı arasynda dıplomatııalyq qarym-qatynastardyń ornaǵanyna 30 jyl tolýyna oraı quttyqtaý hatyn joldady, dep habarlaıdy "Adyrna" ulttyq portaly Aqordanyń baspasóz qyzmetine silteme jasap.

Memleket basshysy eki eldiń tarıhı turǵydan qysqa merzim ishinde álemdik deńgeıdegi úlgili memleketaralyq qatynas qalyptastyrǵanyn atap ótti.

– Buǵan meniń 2019 jyly elińizge jasaǵan saparym barysynda yntymaqtastyǵymyzdy máńgi jan-jaqty strategııalyq áriptestikke kóterý týraly jarııalaǵanymyz dálel. Bul tarıhı sheshimimiz tatý kórshilik, ózara senim men qoldaýǵa negizdelgen teń quqyly qatynastar qurý baǵytyndaǵy eki jaqty kúsh-jigerimizdiń sharyqtaý shyńy boldy. Atap aıtqanda, ortaq shekaramyzǵa qatysty barlyq máselelerdiń túıini tarqap, búginde ol dostyq pen birlik kópirine aınaldy. Osy rette, Qazaqstan men Qytaı shekarasyndaǵy ózenderge qatysty kelissózderdi jýyq arada aıaqtaý memleketaralyq yqpaldastyq jylnamasynyń taǵy bir jarqyn beti bolary anyq, – dedi Qasym-Jomart Toqaev.

Prezıdent memleketterimiz arasyndaǵy ózara túsinistik rýhyndaǵy saıası ahýaldyń saýda-ekonomıkalyq jáne ınvestıııalyq baǵyttaǵy qarqyndy yntymaqtastyǵymyzdyń kepili ekenin aıtty. Osyndaı yqpaldastyqtyń nátıjesinde kásipkerlik pen halyqtarymyzdyń ıgiligine baǵyttalǵan kóptegen birlesken joba tabysty júzege asyrylyp keledi.

– Qazaqstan men Qytaıdy myńdaǵan shaqyrymǵa sozylǵan temir jáne kólik joldary, munaı jáne gaz qubyrlary jalǵap otyrǵanyn erekshe atap ótemin. Osy turǵydan, «Nurly jol» strategııasy men «Bir beldeý, bir jol» bastamasynyń negizgi baǵdary sanalatyn bul «temir kerýen» jyl saıyn taraptarǵa kóptegen otandastarymyzdy, mıllıondaǵan tonna júkterdi jáne mıllıardtaǵan tekshe metr tabıǵı gazdy tasymaldaýǵa múmkindik beredi, – dedi Memleket basshysy.

Sonymen qatar Prezıdent eki el úkimetiniń ortaq múddelerimizdi sátti ilgeriletýde, COVID-19 indetiniń saldaryn joıýda qajyrly jumys istep jatqanyna toqtaldy. Qasym-Jomart Toqaevtyń aıtýynsha,   ekijaqty yntymaqtastyqtyń órkendeýine jáne máńgi jan-jaqty strategııalyq áriptestikti odan ári tereńdetýge qosyp otyrǵan QHR Tóraǵasynyń jeke úlesin Qazaqstanda joǵary baǵalaıdy. Sondaı-aq Memleket basshysy resmı jáne jumys tártibinde turaqty baılanystardy nyǵaıtýda birlese kúsh-jiger jumyldyrýǵa árdaıym daıyn ekenin jetkizdi.

Quttyqtaý sońynda Qasym-Jomart Toqaev Sı zınpınniń asa jaýapty qyzmetine tolaǵaı tabys, al dostas Qytaı halqyna mol yrys pen qut-bereke tiledi.

"Adyrna" ulttyq portaly 

Pikirler