الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى 19 جاستاعى اياجان ەدىلوۆانى زورلادى جانە ايۋاندىقپەن ءولتىردى دەپ ايىپتالعان راحمانبەردى تورەبەكوۆكە ۇكىم شىعاردى دەپ حابارلايدى "ادىرنا" ۇلتتىق پورتالى "orda.kz-كە" سىلتەمە جاساپ.
سوت ايىپتالۋشىنى 25 جىلعا باس بوستاندىعىنان ايىردى. سوت جابىق ءوتتى، سوتتالۋشى القابيلەر سوتىنان باس تارتتى.
اياجان ەدىلوۆانى ءولتىرۋ ءىسى – 2021 جىلدىڭ ەڭ اتىشۋلى ىستەرىنىڭ ءبىرى. ستۋدەنت الماتىداعى سۇلۋلىق سالوندارىنىڭ بىرىندە جۇمىس ىستەگەن. 19 ناۋرىز كۇنى كەشكە ول جۇمىستان شىعىپ، ۇيىنە ورالماعان. ول ءۇش كۇننەن كەيىن ءولى تابىلدى. قىزدى ايۋاندىقپەن ولتىرگەن: دەنەسىن بولشەكتەپ، قوقىس جاشىكتەرىنە تىعىپ قويعان.
پوليتسەيلەر كىسى ءولتىردى دەگەن كۇدىكپەن تۇركىستان وبلىسىنىڭ 28 جاستاعى تۇرعىنىن ۇستادى. ءتارتىپ ساقشىلارى ول تۇرىپ جاتقان پاتەردىڭ ەسىگىن بۇزعان كەزدە، كۇدىكتىنىڭ ءوز-وزىنە قول جۇمساماق بولعانىن انىقتادى. ونى اۋرۋحاناعا اپارىپ، كونۆوي تاعايىندادى. اۋرۋحانادان شىققان سوڭ ونى يزولياتورعا اۋىستىردى.
الماتى قالالىق كريمينالدىق پوليتسيا باسقارماسىنىڭ باستىعى ەركىن ىڭكاروۆ قىز جوعالعان كۇنى الەۋمەتتىك جەلىدە تانىسقان جىگىتپەن كەزدەسپەك بولعانىن ايتتى.
بىراق مارقۇمنىڭ تۋىستارى اياجاننىڭ ءوزىن جاقسى تانىمايتىن اداممەن كەزدەسۋگە كەتكەنىنە سەنبەگەن. ولار قىز ونى جۇمىس ورنىندا كەزدەستىردى دەپ ەسەپتەيدى. تۋىستارى قازاقستان پرەزيدەنتى قاسىم-جومارت توقاەۆتان بۇل ماسەلەنى جەكە باقىلاۋىنا الۋىن ءوتىندى.
كۇدىكتى زيالى وتباسىنان شىققان، جوعارى مەديتسينالىق ءبىلىمى بار، كورشىلەرى ونى تاربيەلى، مادەنيەتتى ادام رەتىندە تانيتىنى بەلگىلى بولدى.
"ادىرنا" ۇلتتىق پورتالى.
