ەنەرگەتيكا ءمينيسترى ماعزۇم مىرزاعاليەۆ قازاقستانداعى اتوم ەلەكتر ستانتسياسىنىڭ بولاشاق قۇرىلىسىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ونىڭ مالىمدەۋىنشە، ەلىمىز حالىقتى ەلەكتر ەنەرگياسىمەن قامتاماسىز ەتۋ ءۇشىن اەس قاجەتتىلىگىن كورەدى.
«بيىل ءبىز بەلگىلى ءبىر تاپشىلىقتىڭ كۋاسى بولىپ، ەلەكتر ەنەرگياسىن يمپورتتاۋعا ءماجبۇر بولدىق. رەسەيدەن جوسپارلانباعان اعىندار بولدى. تيىسىنشە، قازىر 2035 جىلعا دەيىن ءوندىرىس پەن تۇتىنۋ ەلەكتر ەنەرگياسىنىڭ تەڭگەرىمىن جاسادىق. ءبىز حالىقتى جانە ەكونوميكامىزدى ەلەكتر ەنەرگياسىمەن قامتاماسىز ەتۋ ءۇشىن اەس سالۋ قاجەتتىلىگىن انىق كورىپ وتىرمىز»،— دەدى ول وكق بريفينگىندە.
ەنەرگەتيكا مينيسترلىگىنىڭ باسشىسى كەز كەلگەن ستانتسيا، ءبىرىنشى كەزەكتە اەس سالۋدىڭ جىلدام ماسەلە ەمەس ەكەنىن ەسكە سالدى. ايتۋىنشا، وعان ورتاشا ەسەپپەن 10 جىلعا دەيىن ۋاقىت كەتەدى.
«بۇل ماسەلە 2013 جىلدان بەرى تالقىلانىپ كەلەدى. وسى ۋاقىت ىشىندە ءار ءتۇرلى جەر ۋچاسكەلەرى ولاردىڭ سەيسميكالىعىنا، ينفراقۇرىلىمداردىڭ بولۋىنا بايلانىستى زەرتتەلدى. شورت-پاراقتا قازىر ەكى ورىن بار. ءبىرى — ۇلكەن اۋىلى، ەكىنشىسى-كۋرچاتوۆ اۋىلى. سەيسميكالىق جاعىنان ولار قولايلى»،– دەدى مىرزاعاليەۆ.
«ادىرنا» ۇلتتىق پورتالى
