Energetıka mınıstri Maǵzum Myrzaǵalıev Qazaqstandaǵy atom elektr stanııasynyń bolashaq qurylysyna qatysty pikir bildirdi, dep habarlaıdy «Adyrna» tilshisi.
Onyń málimdeýinshe, elimiz halyqty elektr energııasymen qamtamasyz etý úshin AES qajettiligin kóredi.
«Bıyl biz belgili bir tapshylyqtyń kýási bolyp, elektr energııasyn ımporttaýǵa májbúr boldyq. Reseıden josparlanbaǵan aǵyndar boldy. Tıisinshe, qazir 2035 jylǵa deıin óndiris pen tutyný elektr energııasynyń teńgerimin jasadyq. Biz halyqty jáne ekonomıkamyzdy elektr energııasymen qamtamasyz etý úshin AES salý qajettiligin anyq kórip otyrmyz»,— dedi ol OKQ brıfınginde.
Energetıka mınıstrliginiń basshysy kez kelgen stanııa, birinshi kezekte AES salýdyń jyldam másele emes ekenin eske saldy. Aıtýynsha, oǵan ortasha eseppen 10 jylǵa deıin ýaqyt ketedi.
«Bul másele 2013 jyldan beri talqylanyp keledi. Osy ýaqyt ishinde ár túrli jer ýchaskeleri olardyń seısmıkalyǵyna, ınfraqurylymdardyń bolýyna baılanysty zertteldi. Short-paraqta qazir eki oryn bar. Biri — Úlken aýyly, ekinshisi-Kýrchatov aýyly. Seısmıkalyq jaǵynan olar qolaıly»,– dedi Myrzaǵalıev.
«Adyrna» ulttyq portaly
