ERG قۇرامىنداعى «قازحروم» تۇك» اق فيليالى – اقتوبە فەرروقورىتپا زاۋىتىنىڭ قىزمەتكەرى ءالي قوجالەپەس كوپ جىلدان بەرى بريگادير بولىپ ىستەيدى.
ءالي 22 جاسىندا زاۋىتتىڭ دايىن ءونىم تسەحىنا جۇمىسقا ورنالاسقان. سول ۋاقىتتان بەرى جەتى جىل ءوتتى. باستاپقىدا مەتالل ۇساتقىش، كەيىن بريگادير بولىپ جۇمىس ىستەدى. ءتىپتى اۋىسىم شەبەرىنىڭ دە قىزمەتىن اتقاردى. الايدا بىلتىر ەڭبەك دەمالىسىندا ءجۇرىپ، ءوزىن جايسىز سەزىنە باستاعان سوڭ، دارىگەرگە قارالادى. ناتيجەسىندە ءاليدىڭ بويىنان پنەۆمونيادان بولەك وكپەسىنەن تۋا بىتكەن پاتولوگيا انىقتالعان.
— بۇعان دەيىن دەنساۋلىعىم سىر بەرىپ كورمەگەن. بالكىم پنەۆمونيا سول اۋرۋدى ۋاقىتىلى انىقتاۋعا كومەكتەسكەن شىعار. ءسويتىپ قىركۇيەك ايىندا ءبىرىنشى وتا جاساتتىم. جۇمىسقا قايتىپ ورالدىم دا، قاراشا ايىندا قايتادان اۋرۋحاناعا جاتۋعا تۋرا كەلدى. ەكىنشى وتادان كەيىن قالالىق كوميسسيا ماعان 3-توپ مۇگەدەكتىگىن تاعايىندادى. «ءالى دە جاسپىن، الدىمدا نە كۇتىپ تۇر؟» دەگەن ءتۇرلى ويلار مازالادى. سەبەبى زاۋىتتان باسقا جەردە جۇمىس ىستەپ كورمەدىم، بولاشاعىمدى كاسىپورىنمەن عانا بايلانىستىردىم. وتباسىم بار، جارىم بالا كۇتىمىنە بايلانىستى ەڭبەك دەمالىسىنا شىقتى. سوندىقتان مۇگەدەكتىك تاعايىنداعاندا، توبەمنەن سۋ سەپكەندەي كوڭىل-كۇيىم ءتۇسىپ كەتتى. دارىگەرلەردىڭ نۇسقاماسى بويىنشا زاۋىتتا جۇمىس ىستەۋىمە تىيىم سالىندى، — دەيدى 29 جاستاعى ءالي قوجالەپەس.
دەگەنمەن ءالي قامقورلىقسىز قالمادى، كاسىپورىن باسشىلىعى كومەككە قول ۇشىن سوزدى. «حالىقتىق باقىلاۋ» جوباسىنا قاتىسىپ، ۇيدەن جۇمىس ىستەيتىن بەينەباقىلاۋ وپەراتورى بولۋعا ۇسىندى. باقىلاۋشى نوۋتبۋكپەن، مودەممەن، ينتەرنەتپەن جانە تەلەفونمەن جابدىقتالعان. زاۋىت ينتەرنەت پەن تەلەفون بايلانىسىن ءوز ەسەبىنەن تولەيدى. ال كاسىپورىننىڭ IT-قىزمەتى قاشىقتان جۇمىس ىستەيتىن پايدالانۋشىلارعا تەحنيكالىق قولداۋ كورسەتەدى.
— كۇنىگە ءتورت ساعات جۇمىس ىستەيمىن، — دەيدى باقىلاۋشى. – قولىمدا نوۋتبۋك جانە Wi-Fi, ياعني قالاعان بولمەمە كىرىپ، وزىمە ىڭعايلى جەردە وتىرامىن. بەينەكامەرالار ارقىلى ءبىرىنشى، ەكىنشى جانە ءتورتىنشى تسەحتاعى وندىرىستىك پروتسەستى باقىلايمىن. قاۋىپسىزدىك تەحنيكاسى ورىندالماي، كەمشىلىكتەر انىقتالىپ جاتسا، سۋرەتكە ءتۇسىرىپ، تىركەپ الامىن. اۋىسىمىم بىتكەن سوڭ، ەسەبىمدى تسەح باسشىلارىنا، ءوزىمنىڭ جەتەكشىمە جولدايمىن. كوبىنە قىزمەتكەرلەر كوزىلدىرىكتى دۇرىس كيمەيدى نەمەسە قۇرال-جابدىقتاردى قاراۋسىز تاستاپ كەتەدى. وسىنداي ۇساق-تۇيەك كەمشىلىكتەر عانا انىقتالادى.
ازىرگە زاۋىت باسشىلىعى اليمەن ءبىر جىلعا كەلىسىمشارت جاساعان. ەگەر مەديتسينالىق كوميسسيا ونىڭ ساۋلىعىن راستاپ، قايتادان مۇگەدەكتىكتى تاعايىنداماسا، وندا ءالي فەرروقورىتپانى فراكتسياعا ءبولۋ جانە تيەۋ بولىمشەسىنە قايتىپ ورالادى.
«ادىرنا» ۇلتتىق پورتالى.
