قازاقستان الماتى وبلىسىنداعى ۇلكەن اۋىلىنىڭ ماڭىندا اتوم ەلەكتر ستانتسياسىن سالۋ مۇمكىندىگىن قاراستىرۋدا، دەپ حابارلادى «سامۇرىق-قازىنا» ۇلتتىق ءال-اۋقات قورىنىڭ توراعاسى الماسادام ساتقاليەۆ. بۇل تۋرالى "ادىرنا" ۇلتتىق پورتالى حابارلايدى.
«قازىر ءبىز (...) الماتى وبلىسىندا (...) اەس قۇرىلىسىن قاراستىرىپ جاتىرمىز (...) ۇلتتىق ەلەكتر جەلىسىنىڭ توپوگرافياسى بويىنشا ۇلكەن اۋىلى ەڭ قولايلى ايماق. 500 كيلوۆولتتىق جەتكىلىكتى تارماقتالعان جەلى مۇمكىندىگى بار، نەگىزگى قوسالقى ستانتسياسى بار - يۋگ-گرەس 500. بۇل ايماق بازالىق قۋاتتى سول جەرگە ورنالاستىرۋعا (...) جانە ەلەكتر ەنەرگياسىنىڭ سولتۇستىك-وڭتۇستىك ءترانزيتىن تۇراقتاندىرۋعا وتە ىڭعايلى. سونىمەن قاتار ورتالىق قازاقستانعا ەلەكتر قۋاتىن قايتا ءبولۋ مۇمكىندىگى بولعان جاعدايدا «قاراعاندى، ال سولتۇستىك-وڭتۇستىك ترانزيتىندە وڭتۇستىك وبلىستارعا دا تاراتۋعا قولايلى مەكەن", - دەدى ول جۋرناليستەرگە سارسەنبى كۇنگى ۇكىمەت وتىرىسىندا.
ونىڭ ايتۋىنشا، اتوم ەلەكتر ستانتسيالارىنا قاجەتتى قۇرال-جابدىقتاردى شىعاراتىن نەگىزگى وندىرۋشىلەردەن بىرنەشە ۇسىنىستار بار. «رەسەيدەن، قىتايدان، فرانتسيادان ۇسىنىس، امەريكاندىق جابدىق وندىرۋشىلەردەن ەكى ۇسىنىس بار. شەشىمدەردى قابىلداۋ كەزىندە بارلىق سپەكتر – قولدانىلاتىن تەحنولوگيالاردىڭ قاۋىپسىزدىگى، سالىنعان يادرولىق رەاكتورلاردى پايدالانۋ بويىنشا وسىنداي وزىق تاجىريبەلەردىڭ سانى، سونداي-اق باعا ماسەلەسى، وتىندى قازاقستاندا وقشاۋلاۋ مۇمكىندىگى ەسكەرىلەتىن بولادى. قازىردىڭ وزىندە كومپانيا دەڭگەيىندە ءتيىستى تاسىلدەر قاراستىرىلۋدا، دەدى ول.
«اتوم ەلەكتر ستانساسىن سالۋ كەزىندە ءبىز ءوز رەسۋرستارىمىزدى بارىنشا پايدالانۋدى، ونىڭ ىشىندە وتىن تابلەتكالارى مەن وتىن جيناقتارىن ءوندىرۋدى، سونداي-اق تۇپكىلىكتى ءونىمدى قازاقستاندا لوكاليزاتسيالاۋ مۇمكىندىگىن مىندەتتى شارت رەتىندە قويامىز».
مەملەكەتتىك قور باسشىسى «كەزىندە، شامامەن 15 جىل بۇرىن مەن ماگاتە باسشىلىعىمەن وسى تاقىرىپتا سويلەسكەنمىن» دەدى. «سودان كەيىن ماگاتە ەلەكتر جەلىلەرىنىڭ دامۋ ەرەكشەلىكتەرىنە، ءبىزدىڭ ەنەرگەتيكالىق جۇيەنىڭ كەرنەۋ كلاسىنا، بىلىكتى كادرلاردى دايىنداۋ مۇمكىندىگى، لوگيستيكا فاكتورىنا سۇيەنە وتىرىپ، بىزگە رەسەيدى ۇسىندى»، - دەدى ول. «تۇپكىلىكتى شەشىمدى تاڭداعان كەزدە ۇكىمەت بىرقاتار كريتەريلەردى باسشىلىققا الاتىنى انىق». ونىڭ پايىمداۋىنشا، «ەڭ ءتيىمدى شەشىم – اتوم ەنەرگەتيكاسى، ەنەرگيانىڭ بۇل ءتۇرى ەلەكتر ەنەرگياسىمەن تۇراقتى (...) قامتاماسىز ەتەدى جانە قازاقستاننىڭ ۋران رۋداسىن وندىرۋدەگى الەۋەتىن پايدالانادى».
"ادىرنا" ۇلتتىق پورتالى
