مەرەيلى مەرەكەگە وراي، «قازاقستان» ورتالىق كونتسەرت زالىندا «كوكتەم شۋاعى» اتتى كونتسەرت باستالدى. كونتسەرت الدىندا قازاقستان پرەزيدەنتى ايەلدەر قاۋىمىن مەرەكەسىمەن قۇتتىقتادى.
«ەڭ الدىمەن بارشاڭىزدى كوكتەم مەرەيىن الا كەلگەن تاماشا مەرەكە - حالىقارالىق ايەلدەر كۇنىمەن شىن جۇرەكتەن قۇتتىقتايمىن. بۇل كۇن اسىل انانى، سۇيىكتى جاردى، قادىرلى قارىنداستى مەيىرىمگە بولەيتىن ەرەكشە مەرەكە ەكەنىن بىلەمىز. قازاقتا «ۇل تۋسا - ۇرپاعىم وسەدى، قىز تۋسا ۇلتىم وسەدى» دەگەن ۇلاعاتتى ءسوز بار. كەڭ بايتاق ۇلى دالامىزدا ەسىمدەرى ەل ماقتانىشىنا اينالعان ارداقتى ارۋلارىمىز از ەمەس. ايەل اسەمدىك پەن ادەمىلىكتىڭ، كورەگەندىك پەن كوركەمدىكتىڭ، بەرەكە مەن بىرلىكتىڭ سيمۆولى بولىپ تابىلادى»، - دەدى ەلباسى.
پرەزيدەنت سوزىندە حالقىمىز «دانالاردىڭ ءوزى انالاردان تۋادى» دەپ بەكەر ايتپاعانىن اتاپ ءوتتى.
«گەندەرلىك ساياسات پەن فەمينيزم ءداستۇرى قازاق مادەنيەتى ءۇشىن ەشقاشان جاڭالىق بولعان ەمەس. دالا وركەنيەتىنىڭ نەگىزىن قالاعان بابالارىمىز قىزداردى قادىرلەۋدى ءاۋ باستا ءومىر سالتىنا اينالدىرعان. ايەلدەر قاۋىمى مەملەكەت پەن قوعام ءومىرىنىڭ بارلىق سالاسىندا ايانباي ەڭبەك ەتۋدە. قازىرگى جاھاندانۋ زامانىندا قازاق قىزدارىنا ءتان اسىل قاسيەتتەردى ساقتاپ قالۋىمىز كەرەك. ينتەرنەت داۋىرىندە سىرتتان اعىلعان اقپارات تاسقىنىنا ءبىرجولا شەكتەۋ قويىپ جاتۋ مۇمكىن ەمەس. ونىڭ اراسىندا جان دۇنيەسىنە جات سان ءتۇرلى ماعلۇماتتار بار. ءاربىر قازاقتىڭ قىزىندا ءداۋىردىڭ جاقسىسىن بويىنا ءسىڭىرىپ، جامانىنا ىشكى سۇزگى بولۋى كەرەك»، - دەدى پرەزيدەت. 
مەملەكەت باسشىسى ءوز سوزىندە بۇگىنگى بويجەتكەن - ەرتەڭگى انا، ۇرپاق تاربيەلەۋشىسى ەكەنىن قىزدارىمىز ۇمىتپاسا ەكەن دەگەن تىلەگىن ءبىلدىردى.
«قازىرگى قازاقتىڭ قىزدارى قانداي بولسا، ەرتەڭ تۇتاس ۇرپاق سونداي بولادى. سوندىقتان، ار-نامىس، ادالدىق پەنەن ادامگەرشىلىك، ىزگىلىك پەن قايىرىمدىلىق، ادەپتىلىك سەكىلدى اسىل قاسيەتتەر قازاق ارۋلارىنىڭ بويىنداعى ۇلتتىق يمۋنيتەت ىسپەتتى. ءبىز ارۋلاردى ارداقتاپ، ولاردى كيەلى شاڭىراقتىڭ التىن دىڭگەگىنە اينالدىرعان ەلمىز. ءبىر زاماندا بابالارىمىز «ايەل ىرىسىڭ، قىز ءورىسىڭ، كەلىنىڭ تىنىسىڭ» دەگەن. بۇگىن سىزدەر ۇلىستىڭ ۇيىققىسىنا، ۇلتتىڭ ۇياتىنا، بەرەكەنىڭ باستاۋىنا اينالدىڭىزدار. سەبەبى، ءبىز تاۋەلسىز ەلدە تۇرىپ جاتىرمىز. ساياساتتىڭ ءبارىن ءوزىمىز شەشىپ جاتىرمىز. تاتۋلىق پەن تۇراقتىلىقتىڭ باعاسىن اق جاۋلىقتى انالاردان ارتىق ەشكىم بىلمەيدى»، - دەدى نۇرسۇلتان نازارباۆەۆ.
ءسوز سوڭىندا پرەزيدەنت استانا قالاسىنىڭ تۇرعىندارى، كوپ بالالى انالار قاتارىنداعى ر.اياعانوۆا مەن ا.تۇزەلباەۆاعا «التىن القا» ماراپاتىن تابىس ەتتى.
ايتا كەتسەك، «كوكتەم شۋاعى» كونتسەرتىنە ەلىمىزگە بەلگىلى روزا رىمباەۆا، ءمادينا سادۋاقاسوۆا، الماس كىشكەنباەۆ، ءمولدىر اۋەلبەكوۆا مەن نۇرجان كەرمەنباەۆ سەكىلدى انشىلەر ونەر كورسەتۋدە.
inform.kz
