Mereıli merekege oraı, «Qazaqstan» ortalyq konert zalynda «Kóktem shýaǵy» atty konert bastaldy. Konert aldynda Qazaqstan Prezıdenti áıelder qaýymyn merekesimen quttyqtady.
«Eń aldymen barshańyzdy kóktem mereıin ala kelgen tamasha mereke - Halyqaralyq áıelder kúnimen shyn júrekten quttyqtaımyn. Bul kún asyl anany, súıikti jardy, qadirli qaryndasty meıirimge bóleıtin erekshe mereke ekenin bilemiz. Qazaqta «Ul týsa - urpaǵym ósedi, qyz týsa ultym ósedi» degen ulaǵatty sóz bar. Keń baıtaq Uly dalamyzda esimderi el maqtanyshyna aınalǵan ardaqty arýlarymyz az emes. Áıel ásemdik pen ádemiliktiń, kóregendik pen kórkemdiktiń, bereke men birliktiń sımvoly bolyp tabylady», - dedi Elbasy.
Prezıdent sózinde halqymyz «Danalardyń ózi analardan týady» dep beker aıtpaǵanyn atap ótti.
«Genderlik saıasat pen femınızm dástúri qazaq mádenıeti úshin eshqashan jańalyq bolǵan emes. Dala órkenıetiniń negizin qalaǵan babalarymyz qyzdardy qadirleýdi áý basta ómir saltyna aınaldyrǵan. Áıelder qaýymy memleket pen qoǵam ómiriniń barlyq salasynda aıanbaı eńbek etýde. Qazirgi jahandaný zamanynda qazaq qyzdaryna tán asyl qasıetterdi saqtap qalýymyz kerek. Internet dáýirinde syrttan aǵylǵan aqparat tasqynyna birjola shekteý qoıyp jatý múmkin emes. Onyń arasynda jan dúnıesine jat san túrli maǵlumattar bar. Árbir qazaqtyń qyzynda dáýirdiń jaqsysyn boıyna sińirip, jamanyna ishki súzgi bolýy kerek», - dedi Prezıdet. 
Memleket basshysy óz sózinde búgingi boıjetken - erteńgi ana, urpaq tárbıeleýshisi ekenin qyzdarymyz umytpasa eken degen tilegin bildirdi.
«Qazirgi qazaqtyń qyzdary qandaı bolsa, erteń tutas urpaq sondaı bolady. Sondyqtan, ar-namys, adaldyq penen adamgershilik, izgilik pen qaıyrymdylyq, ádeptilik sekildi asyl qasıetter qazaq arýlarynyń boıyndaǵy ulttyq ımýnıtet ispetti. Biz arýlardy ardaqtap, olardy kıeli shańyraqtyń altyn dińgegine aınaldyrǵan elmiz. Bir zamanda babalarymyz «Áıel yrysyń, qyz órisiń, keliniń tynysyń» degen. Búgin Sizder ulystyń uıyqqysyna, ulttyń uıatyna, berekeniń bastaýyna aınaldyńyzdar. Sebebi, biz Táýelsiz elde turyp jatyrmyz. Saıasattyń bárin ózimiz sheship jatyrmyz. Tatýlyq pen turaqtylyqtyń baǵasyn aq jaýlyqty analardan artyq eshkim bilmeıdi», - dedi Nursultan Nazarbavev.
Sóz sońynda Prezıdent Astana qalasynyń turǵyndary, kóp balaly analar qataryndaǵy R.Aıaǵanova men A.Túzelbaevaǵa «Altyn alqa» marapatyn tabys etti.
Aıta ketsek, «Kóktem shýaǵy» konertine elimizge belgili Roza Rymbaeva, Mádına Sádýaqasova, Almas Kishkenbaev, Móldir Áýelbekova men Nurjan Kermenbaev sekildi ánshiler óner kórsetýde.
inform.kz
