قر قارۋلى كۇشتەرى اسكەري اۋە كۇشتەرىنە قاراستى 53898 اسكەري بولىمىندەگى اعا ۇشقىش ءارى نۇسقاۋشى لەيتەنانت اردانا بوتاي ءوزىنىڭ اسكەري قىزمەتىن ابىرويمەن اتقارىپ كەلەدى، دەپ حابارلايدى «قازاقپارات» حاا ءتىلشىسى.
اردانا بوتاي بالا كەزىنەن ۇشقىش بولۋدى ارمانداپ، جويعىش ۇشاقتى تىزگىندەۋدى ماقسات ەتىپتى. وسى ارمان ون التى جاستاعى بويجەتكەندى مەملەكەتتىك اۆياتسيالىق ورتالىققا جەتەلەپ كەلگەن. ورتالىقتا ۇزدىكتەردىڭ ءبىرى بولعان كۋرسانت تل-2000, Diamond-42 جانە Techam-P 2002 سەكىلدى جەڭىل موتورلى ۇشاقتاردى جۇرگىزۋدى ۇيرەنەدى.
جوعارى ۇشقىش ماماندىعىن ول قازاقستان رەسپۋبليكاسىنىڭ ازاماتتىق اۆياتسيا اكادەمياسىندا العان. وقۋ اياقتالىسىمەن اردانا 2010 جىلدىڭ قاڭتار ايىنان باستاپ ان-26 اسكەري-كولىكتىك ۇشاق ەكيپاجى كومانديرىنىڭ كومەكشىسى بولىپ قىزمەتكە كەلەدى. قازىرگى ۋاقىتتا بالقاش قالاسىنداعى 53898 اسكەري بولىمىندە اسكەري قىزمەتىن وتەپ ءجۇر.
«قۇس سەكىلدى سامعاپ ءجۇرىپ، كوك اسپانعا عاشىق بولماۋ مۇمكىن ەمەس. بالا كەزدەن ۇشۋدى ارماندايتىن ەدىم. كىشكەنە كەزىمدە اكەم ەكەۋمىزدىڭ الماتىعا ۇشىپ بارعانىمىز ەسىمدە. سول كەزدىڭ وزىندە مەن پيلوتتىڭ ەڭ باستى مىندەتى - كەز كەلگەن جاعدايدا دۇرىس شەشىم قابىلداۋ ەكەنىن سەزىندىم. ۇشقىشتار - اۋەدەگى قورعاۋشىلار ەمەس پە!؟»، - دەيدى اردانا بوتاي.
matritca.kz
