تاۋەلسىزدىك جىلدارىندا قازاقستاننىڭ سىرتقى ساۋدا اينالىمىنىڭ كولەمى 100 ملرد دوللارعا جەتتى

1719
Adyrna.kz Telegram

تاۋەلسىزدىك جىلدارىندا قازاقستاننىڭ سىرتقى ساۋدا اينالىمىنىڭ كولەمى 100 ملرد دوللارعا جەتتى. بۇل تۋرالى قر پرەمەر-ءمينيسترىنىڭ ورىنباسارى ەرالى توعجانوۆ تاۋەلسىزدىكتىڭ 30 جىلدىعىنا ارنالعان عىلىمي-پراكتيكالىق كونفەرەنتسيادا ايتتى.

«ەلىمىزگە 400 ملرد دوللار شەتەل ينۆەستيتسياسى تارتىلدى. مويىنداۋ كەرەك، بۇل جەتىستىكتىڭ نەگىزىندە، ءبىرىنشى كەزەكتە، مەملەكەت باسشىلىعىنىڭ تۇراقتىلىقتىڭ كەپىلى رەتىندەگى تۇلعاسىنا دەگەن جوعارى سەنىم جاتىر»، -دەدى ۇكىمەت باسشىسىنىڭ ورىنباسارى.

ونىڭ پايىمىنشا، قازاقستاننىڭ تمد ەلدەرىنىڭ ىشىندە تارتىلعان ينۆەستيتسيانىڭ بويىنشا جەتەكشى ورىندا تۇرۋى – زاڭدىلىق. «2002 جىلى قازاقستان بۇرىنعى كەڭەستىك رەسپۋبليكالاردىڭ ىشىندە ءبىرىنشى بولىپ جەتەكشى حالىقارالىق رەيتينگ اگەنتتىكتەرى تاراپىنان ينۆەستيتسيالىق تارتىمدى ەل دەپ تانىلدى. بيىل بۇكىل رەيتينگ اگەنتتىكتەرى ينۆەستيتسيالىق رەيتينگ بويىنشا بەرگەن باعالارىن راستادى. ءتىپتى كوپتەگەن كورسەتكىشتەردى قازاقستان ۇكىمەتىنىڭ ءرولى مەن جالپى ەل ەكونوميكاسىنىڭ تۇراقتىلىعىن، سونداي-اق، قارجىلىق سالانىڭ ورنىقتىلىعىن اتاي وتىرىپ كوتەردى.

بۇل ۇلت كوشباسشىسى نۇسقاعان «100 ناقتى قادام» اياسىنداعى ينستيتۋتسيونالدىق رەفورمالاردى ءتيىمدى ەنگىزۋدىڭ ارقاسىندا بولدى»، - دەگەن ەرالى توعجانوۆ Astana حالىقارالىق قارجى ورتالىعىنىڭ بۇگىنگە رولىنە توقتالدى.

«2018 جىلى Astana حالىقارالىق قارجى ورتالىعى قۇرىلدى. ول قازىر شەتەل ينۆەستيتسيانىڭ تارتۋ مەن حالىقارالىق دەڭگەيدە قارجىلىق قىزمەت كورسەتۋدىڭ حابىنا اينالدى. بۇگىن قازاقستاننىڭ سىرتقى ساۋدا اينالىمىنىڭ كولەمى 100 ملرد دوللار بولىپ وتىر. بۇل ەلدىڭ حالىقارالىق رەزەرۆىن ۇلعايتتى»، - دەدى ۆيتسە-پرەمەر.

 

پىكىرلەر