قر پارلامەنتى سەناتىنىڭ جالپى وتىرىسىندا «قازاقستان رەسپۋبليكاسى تاۋەلسىزدىگىنىڭ 30 جىلدىعىنا بايلانىستى راقىمشىلىق جاساۋ تۋرالى» زاڭى قابىلداندى.
«قۇجاتتىڭ ماقساتى – اسا اۋىر ەمەس جانە اۋىرلىعى ورتاشا قىلمىس ءۇشىن جازادان بوساتۋ جانە كەيبىر اۋىر، اسا اۋىر قىلمىستار ءۇشىن جازا مەرزىمىن قىسقارتۋ. راقىمشىلىق ارداگەرلەرگە، كامەلەتكە تولماعاندارعا، جاسى ۇلكەندەرگە، ءبىرىنشى جانە ەكىنشى توپتاعى مۇگەدەكتەرگە، قوعامعا قاۋىپ توندىرمەيتىن ادامدارعا قولدانىلادى»، - دەدى ىشكى ىستەر ءمينيسترى ەرلان تۇرعىمباەۆ.
ونىڭ ايتۋىنشا، زاڭ جوباسىن تالقىلاۋعا مەملەكەتتىك ورگان وكىلدەرى، قوعام قايراتكەرلەرى جانە ساراپشىلار اتسالىسقان، عىلىمي-قۇقىقتىق ساراپتاما جاسالدى «ەلىمىزدەگى 64 مەكەمە مەن 16 تەرگەۋ يزولياتورىندا 34 مىڭ ادام بار. ونىڭ ىشىندە 30 مىڭ ازاماتقا سوت ۇكىمى شىققان. قالعان 4 مىڭ ادام تەرگەۋدە قاماۋدا وتىر. 93 پايىزى اۋىر جانە اسا اۋىر قىلمىس جاساعانى ءۇشىن قاماۋدا وتىر. 45 پايىزى ونىڭ الدىندا بىرنەشە رەت سوتتالعان. سونىمەن قاتار، 32 مىڭ ادام پروباتسيالىق باقىلاۋدا»، - دەدى ەرلان تۇرعىمباەۆ.
ءمينيستردىڭ سوزىنە قاراعاندا، جوبا بويىنشا 2292 سوتتالۋشىعا، 11 753 پروباتسيادا تۇرعان ادامعا راقىمشىلىق جاسالادى. ناتيجەسىندە، 1000 ادام قاماۋدان بوستاندىققا شىعادى. 3881ادام پروباتسيالىق باقىلاۋدان بوساتىلادى.
«ەكىنشىدەن، 1330 سوتتالۋشىعا، 7492 پروباتسيادا تۇرعان ادامعا جازا مەرزىمى قىسقارتىلادى. ۇشىنشىدەن، سوتقا دەيىنگى تەرگەۋ وندىرىسىندەگى 5 مىڭ قىلمىستىق ءىس قىسقارتىلادى. ونىڭ ىشىندە 1674 ادام قىلمىستىق جاۋاپكەرشىلىكتەن بوساتىلادى. 1471 ادامعا سوت ورگاندارى جازا مەرزىمىن قىسقارتۋ نەمەسە بوساتۋ ەرەجەلەرى قولدانىلادى»، - دەدى ە.تۇرعىمباەۆ.
ۆەدومستۆو باسشىسى زاڭ بويىنشا اسا اۋىر قىلمىس جاساعان ازاماتتارعا راقىمشىلىق جاساۋعا تىيىم سالىنعانىن ەسكەرتتى.
