QR Parlamenti Senatynyń jalpy otyrysynda «Qazaqstan Respýblıkasy Táýelsizdiginiń 30 jyldyǵyna baılanysty raqymshylyq jasaý týraly» Zańy qabyldandy.
«Qujattyń maqsaty – asa aýyr emes jáne aýyrlyǵy ortasha qylmys úshin jazadan bosatý jáne keıbir aýyr, asa aýyr qylmystar úshin jaza merzimin qysqartý. Raqymshylyq ardagerlerge, kámeletke tolmaǵandarǵa, jasy úlkenderge, birinshi jáne ekinshi toptaǵy múgedekterge, qoǵamǵa qaýip tóndirmeıtin adamdarǵa qoldanylady», - dedi Ishki ister mınıstri Erlan Turǵymbaev.
Onyń aıtýynsha, zań jobasyn talqylaýǵa memlekettik organ ókilderi, qoǵam qaıratkerleri jáne sarapshylar atsalysqan, ǵylymı-quqyqtyq saraptama jasaldy «Elimizdegi 64 mekeme men 16 tergeý ızolıatorynda 34 myń adam bar. Onyń ishinde 30 myń azamatqa sot úkimi shyqqan. Qalǵan 4 myń adam tergeýde qamaýda otyr. 93 paıyzy aýyr jáne asa aýyr qylmys jasaǵany úshin qamaýda otyr. 45 paıyzy onyń aldynda birneshe ret sottalǵan. Sonymen qatar, 32 myń adam probaııalyq baqylaýda», - dedi Erlan Turǵymbaev.
Mınıstrdiń sózine qaraǵanda, joba boıynsha 2292 sottalýshyǵa, 11 753 probaııada turǵan adamǵa raqymshylyq jasalady. Nátıjesinde, 1000 adam qamaýdan bostandyqqa shyǵady. 3881adam probaııalyq baqylaýdan bosatylady.
«Ekinshiden, 1330 sottalýshyǵa, 7492 probaııada turǵan adamǵa jaza merzimi qysqartylady. Úshinshiden, sotqa deıingi tergeý óndirisindegi 5 myń qylmystyq is qysqartylady. Onyń ishinde 1674 adam qylmystyq jaýapkershilikten bosatylady. 1471 adamǵa sot organdary jaza merzimin qysqartý nemese bosatý erejeleri qoldanylady», - dedi E.Turǵymbaev.
Vedomstvo basshysy zań boıynsha asa aýyr qylmys jasaǵan azamattarǵa raqymshylyq jasaýǵa tyıym salynǵanyn eskertti.
