تاۋەلسىزدىك العالى 30 جىلدىڭ ىشىندە اۋىل شارۋاشىلىعى قالاي دامىدى؟

1635
Adyrna.kz Telegram

ەلىمىز تاۋەلسىزدىك العالى 30 جىلدىڭ ىشىندە اۋىل شارۋاشىلىعى قانداي جەتىستىكتەرگە جەتتى؟ جانە بۇگىندە اتالعان سالا قالاي دامىپ جاتىر؟

وسى ماسەلەگە قاتىستى «اۋىل» پارتياسىنىڭ توراعاسى، قر پارلامەنتى سەناتىنىڭ دەپۋتاتى ءالي بەكتاەۆ پىكىر ايتتى.

«الدىمەن اگروونەركاسىپ جانە اگروكەشەن بويىنشا زاڭنامانى قالىپتاستىردىق. بۇگىندە زاڭ جاعىنان كىنارات جوق، حالىقارالىق تالاپتارعا تولىق سايكەس كەلەدى. ال ول ونىڭ ءتيىستى دەڭگەيدە ورىندالۋى بولەك ماسەلە. ەكىنشى ءىرى جەتىستىك، مال شارۋاشىلىعىنا قاتىستى. اتاپ ايتقاندا، وتاندىق مال تۇقىمىن تازالادىق. بىزدەگى ءىرى، ۇساق بولسىن مالدىڭ تۇقىمى تازا. سوندىقتان دا الىس-جاقىن شەتەلدەن قازاقستاننىڭ مالىنا دەگەن سۇرانىس جوعارى. اۋىل شارۋاشىلىعى سالاسىنداعى ءۇشىنشى جەتىستىك، 2003-2005 جىلدارى قر تۇڭعىش پرەزيدەنتى، ەلباسى نۇرسۇلتان نازارباەۆتىڭ باستاماسىمەن ەلىمىزدە «اۋىل جىلى» اتالىپ ءوتىلدى. 3 جىلدىق اۋىلدى دامىتۋ مەملەكەتتىك باعدارلاماسىنىڭ نەگىزىندە كوپتەگەن اۋىلعا ايتارلىقتاي جان ءبىتتى. ونىڭ ىشىندە ينفراقۇرىلىم، جۇمىس، تۇرعىن ءۇي، مەكتەپ، اۋرۋحانا جانە اۋىل الەۋەتى دامي ءتۇستى»، - دەيدى ول. سەنات دەپۋتاتىنىڭ ايتۋىنشا، اۋىل مەن اۋىل شارۋاشىلىعىن دامىتۋ باعىتىنداعى جۇمىس جالعاسىن تابادى. «بۇگىندە «اۋىل - ەل بەسىگى» جوباسى ىسكە اسىپ جاتىر. ودان بولەك، اۋىل شارۋاشىلىعىن ىلگەرىلەتۋگە ارنالعان ۇلتتىق جوبا بار»، - دەدى ءا. بەكتاەۆ.

ايتا كەتسەك، بۇگىن ەلوردادا «تاۋەلسىزدىك جانە قازاقستاننىڭ اگروونەركاسىپ كەشەنىنىڭ دامۋى» تاقىرىبىندا كونفەرەنتسيا ءوتىپ جاتىر. رەسپۋبليكالىق كونفەرەنتسيا تاۋەلسىزدىگىنىڭ 30 جىلدىعىنا ارنالىپ، «30 يگى ءىس» اكتسياسىنىڭ اياسىندا ۇيىمداستىرىلىپ وتىر. جانە وعان سەنات دەپۋتاتتارى، قۇزىرلى مەملەكەتىك ورگان وكىلدەرى مەن اۋىل شارۋاشىلىعى سالاسى ماماندارى قاتىسىپ جاتىر. اتالعان شارا «اۋىل» پارتياسىنىڭ ۇيىتقى بولۋىمەن ۇيىمداستىرىلدى.

 

پىكىرلەر