تاۋەلسىزدىك جىلدارىندا قازاقستاندى وڭىرلىك لوگيستيكالىق حابقا اينالدىرۋ، ترانزيتتىك الەۋەتى دامىعان ەلدىڭ قاتارىنا جەتكىزۋ ستراتەگيالىق شەشىمىنە ەكپىن قويىلدى. قر پرەزيدەنتى قاسىم-جومارت توقاەۆ ۇكىمەتكە «نۇرلى جول» مەملەكەتتىك باعدارلاماسىن ىسكە اسىرۋ اياسىندا كولىك لوگيستيكاسى جۇيەسىنىڭ تيىمدىلىگىن ارتتىرۋدى جانە ەلدىڭ ترانزيتتىك الەۋەتىن ودان ءارى دامىتۋدى تاپسىردى. بۇگىندە 400 مىڭنان استام ادام جۇمىسپەن قامتىلعان ەلدىڭ كولىك سالاسى ەكونوميكانىڭ سەرپىندى دامۋىنىڭ درايۆەرلەرىنىڭ ءبىرى بولىپ وتىر.
اتاپ ايتقاندا، قازاقستان كولىك سالاسىن جانە كولىك دالىزدەرىنىڭ ترانزيتتىك الەۋەتىن دامىتۋ ءۇشىن زور كۇش-جىگەر جۇمساپ كەلەدى. وسى ورايدا بىرقاتار سالالىق باعدارلامالار ىسكە اسىرىلىپ، سالانىڭ قۇقىقتىق نەگىزى قالىپتاستىرىلدى. كولىك قىزمەتتەرىن كورسەتۋدىڭ قولايلى باسەكەلەستىك ورتاسى قۇرىلدى.
جاڭا ماگيسترالدىق تەمىر جول جەلىلەرىنە اۋقىمدى ينۆەستيتسيالار قازاقستاندىق ينفراقۇرىلىمدى جاھاندىق كولىك-لوگيستيكالىق اعىندارعا ينتەگراتسيالادى جانە ۋاقىت پەن جەتكىزۋ جىلدامدىعى بويىنشا باسەكەگە قابىلەتتى قازاقستان اۋماعى ارقىلى جاڭا ترانزيتتىك دالىزدەردى قالىپتاستىرۋعا مۇمكىندىك بەردى:
• قىتايدان ەۋروپاعا قازاقستان، رەسەي جانە بەلارۋس اۋماعى ارقىلى (سولتۇستىك تتجم),
• قىتايدان ەۋروپاعا كاسپي، ازەربايجان، گرۋزيا جانە تۇركيا ارقىلى (تحكم),
• قىتايدان ورتالىق ازياعا،
• «سولتۇستىك-وڭتۇستىك» ءدالىزى تۇرىكمەنستان، يران اۋماعى ارقىلى پارسى شىعاناعى ەلدەرى باعىتىندا.
دامىعان ينفراقۇرىلىمدى ەسكەرە وتىرىپ، قازاقستان اۋماعى ارقىلى 11 حالىقارالىق ترانزيتتىك ءدالىز، ونىڭ ىشىندە 5 تەمىرجول جانە 6 اۆتوموبيل ءدالىزى وتەدى.
قر يندۋستريا جانە ينفراقۇرىلىمدىق دامۋ مينيسترلىگى مالىمەتىنشە، بۇگىنگى كۇنى قازاقستان اۋماعى ارقىلى شىعىس-باتىس باعىتىنداعى جەرۇستى باعىتتارى بويىنشا 10-نان 12 مىڭ شاقىرىمعا دەيىنگى قاشىقتىقتا جەتكىزۋ جىلدامدىعى 13-16 كۇندە قامتاماسىز ەتىلەدى. وسىلايشا، ترانسقازاقستاندىق دالىزدەر بويىنشا جەتكىزۋ تەڭىزبەن سالىستىرعاندا 3 ەسە جىلدام، اۋە كولىگىنە قاراعاندا 10 ەسە ارزان جانە بۇل ترانسكونتينەنتالدىق تاسىمالدارداعى جاڭا لوگيستيكالىق شەشىم.
