قاراعاندىدا ەل ەگەمەندىگىنىڭ 30 جىلدىعىنا وراي تۇڭعىش رەت ۇيىمداستىرىلعان «تاۋەلسىزدىك: ءسوز بەن سۋرەت» اتتى اقىندار مەن سۋرەتشىلەر اراسىنداعى رەسپۋبليكالىق بايقاۋىنىڭ جەڭىمپازدارى ماراپاتتالىپ، كىتاپ البومى تانىستىرىلدى, دەپ حابارلايدى "ادىرنا" ۇلتتىق پورتالى madeniportal.kz-كە سىلتەمە جاساپ.
سالتاناتتى ماراپاتتاۋ ءراسىمى ساكەن سەيفۋللين اتىنداعى قاراعاندى وبلىستىق قازاق دراما تەاترىندا ءوتتى. تاۋەلسىزدىك تاريحىندا تۇڭعىش رەت وتكىزىلگەن 4 ايعا سوزىلعان مەگا جوبا اياسىندا بايقاۋعا 101 سۋرەتشى قاتىسىپ، 300-دەن استام كارتينا كەلىپ تۇسكەن. سولاردىڭ ىشىندە 8 سۋرەتشى مەن 8 اقىن ۇزدىكتەر قاتارىنان تابىلدى.
ەلىمىزدە بۇعان دەيىن بولماعان مەگا جوبانىڭ اياسىندا جەڭىمپاز سۋرەتشىلەردىڭ كورمەسى ۇيىمداستىرىلدى. كورمەگە قازاق بەينەلەۋ ونەرى مەن ادەبيەتىنىڭ مايتالماندارى جانە قاراعاندى وبلىسىنىڭ ەلىم دەپ ەمىرەنگەن تۇلعالارى قاتىستى.
«تاۋەلسىزدىك: ءسوز بەن سۋرەت» رەسپۋبليكالىق بايقاۋىنىڭ سۋرەتشىلەرگە ارنالعان كەزەڭىڭە قازىلىق ەتكەن قازىلار القاسىنىڭ توراعاسى، قر ەڭبەك سىڭىرگەن قايراتكەرى، «قازاق ەلى» مونۋمەنتىنىڭ اۆتورى سەمبىعالي سماعۇلوۆ كورمەگە قويىلعان ءاربىر كارتيناعا جەكە-جەكە توقتالىپ، قازاق بەينەلەۋ ونەرىنىڭ قارىشتاپ دامىپ كەلە جاتقانىنا قۋانعانىن جاسىرمادى.
باعدارلاما بويىنشا كورمەدەن كەيىن جەڭىمپاز اقىنداردىڭ ولەڭدەرى قازاق، ورىس جانە اعىلشىن تىلدەرىنە اۋدارىلىپ، سۋرەتشىلەردىڭ كارتينالارىمەن بىرگە جارىققا شىققان ارنايى البومنىڭ تۇساۋكەسەرى ءوتتى.
تۇساۋكەسەردە ءسوز العان قاراعاندى وبلىسى اكىمىنىڭ ورىنباسارى ابزال نۇكەنۇلى قر تاۋەلسىزدىگىنىڭ 30 جىلدىعىنا وراي ۇيىمداستىرىلعان مەگا جوبانىڭ قاتىسۋشىلارىنا شىعارماشىلىق تابىس تىلەپ، اتالعان جوبانىڭ بۇدان ءارى دامي ءھام جەتىلە تۇسۋىنە تىلەك ءبىلدىردى.
رەسپۋبليكالىق بايقاۋدىڭ اقىندارعا ارنالعان كەزەڭىنە قازىلىق ەتكەن قازىلار القاسىنىڭ مۇشەسى سەرىك ساعىنتاەۆ، ساراپشىلار مۇشەسىنىڭ توراعاسى سۇراعان راحمەتۇلى جانە قازاقتىڭ كورنەكتى اقىنى عالىم جايلىباي دا قوس ونەردىڭ باسىن بىرىكتىرگەن جوبانىڭ ۇيىمداستىرۋشىلارى قاراعاندى وبلىسى مەن «مادەنيەت پورتالى» زور العىسىن ءبىلدىردى.
ارمەن قاراي «تاۋەلسىزدىك: ءسوز بەن سۋرەت» رەسپۋبليكالىق بايقاۋىنىڭ ماراپاتتاۋ كەشى جەڭىمپاز سۋرەتشىلەر مەن اقىنداردىڭ شىعارمالارى جايلى ارنايى تۇسىرىلگەن بەينەروليكتەردى تاماشالاۋمەن جالعاستى. كەش بارىسىندا جەڭىمپازدار ارنايى ديپلومدار مەن قارجىلاي سىيلىقتارمەن ماراپاتتالدى.
ايتا كەتەيىك، ءتورت ايعا سوزىلعان مەگا جوبانىڭ سۋرەتشىلەرگە ارنالعان العاشقى كەزەڭىنە 101 سۋرەتشى، 300-دەن استام كارتينا كەلىپ تۇسسە، ەكىنشى كەزەڭدە 100-گە جۋىق اقىندار باقتارىن سىنادى. ولاردىڭ ىشىنەن تەك قانا 8 سۋرەتشى مەن 8 اقىن ۇزدىكتەر قاتارىنان تابىلدى.
"ادىرنا" ۇلتتىق پورتالى
