قازاقستان حالقى اسسامبلەياسى 1995 جىلى قۇرىلىپ، وسى ۋاقىتقا دەيىن جەمىستى قىزمەت ەتىپ كەلەدى. اسسامبلەيانىڭ باستى ماقساتى سان ءتۇرلى ۇلتتاردىڭ باسىن قوسقان قوعامدا تىنىشتىق پەن تاتۋلىقتى ساقتاۋ، وركەندەۋ مەن دامۋ جولىن سالۋ بولىپ تابىلادى. اسسامبلەيا بۇل ميسسيانى مۇلتىكسىز ورىنداپ كەلەدى.
90-جىلداردان باستاپ پوستكەڭەستىك ەلدەر اۋمالى-توكپەلى زاماندى باستان كەشىردى. كورشىلەس ەلدەر ازامات سوعىسىنا باتىپ، توڭكەرىس ۇيىعىنان شىعا الماي قالدى. باسىم بولىگىندە قاقتىعىستاردىڭ سوڭى ەتنيكالىق سيپاتقا ۇلاسىپ، ءىرى ەتنوسارالىق جانجالدار. بىراق قازاقستان ول قاقتىعىستاردىڭ الدىن الا ءبىلدى. ويتكەنى وزگەنىڭ قاتەلىگىنەن ساباق الۋ قاشاندا ماڭىزدى.
قازاقستان ءتۇرلى ەتنوس وكىلدەرىنىڭ تاتۋلىعىن ساقتاۋ ماقساتىندا سان قيلى جوبالاردى جۇزەگە اسىرىپ كەلەدى. ونىڭ ىشىندە رەسپۋبليكالىق جانە ايماقتىق جوبالار بار. سونىڭ ءبىرى جىل سايىن الماتى قالاسىندا ۇيىمداستىرىلاتىن «بىرلىك - بەرەكە باستاۋى». بيىل دا جوبا ءساتتى جۇزەگە استى. جوبا اياسىندا الماتى قالاسى بويىنشا سان ءتۇرلى ۇلتتاردىڭ باسىن قوسىپ، تاتۋلىق تۋىن جەلبىرەتۋ ماقساتىندا، دوستىق پەن تانىستىقتى ارتتىرۋ ءۇشىن كوپتەگەن شارالار ۇيىمداستىرىلدى. اتاپ ايتقاندا جوبا اياسىندا ەكى چەللەندج ۇيىمداستىرىلدى. چەللەندجدەردىڭ ماقساتى وزگە ۇلت وكىلدەرى اراسىندا مەملەكەتتىك ءتىلدى بىلەتىن جانداردى انىقتاۋ جانە سول ارقىلى ءتىلدى ۇيرەنۋگە دەگەن ستيمۋلدى ارتتىرۋ، ال ەكىنشى چەللەندج حاكىم اباي ولەڭدەرىنەن ءۇزىندى شىعارمالار وقۋ بولىپ، چەللەندجدەرگە مىڭنان استام جان قاتىسىپ، قىزىقتى فورماتتا ءوتتى. مەملەكەتتىك ءتىلدى بىلەتىن، مەڭگەرىپ، ونى ەكىنشى انا ءتىلى سانايتىن وزگە ەتنوستاردى جيناقتاپ، ارنايى ەلەكتروندى كادرلىق رەزەرۆ جاسالدى. اتالمىش كادرلىق رەزەرۆتىڭ ماقساتى تالانتتى جاستاردى قولداۋ، ولارعا جۇمىس تابۋدىڭ جولىن اشۋ، مانساپتىق وسۋىنە جاعداي جاساۋ بولىپ تابىلادى. سونىمەن قاتار وزگە ۇلت وكىلدەرى اراسىندا ءتىلدى ۇيرەنۋدى ناسيحاتتاۋ، دوستىقتى ارتتىرۋدى ۇگىتتەۋ ماقساتىندا ارنايى كەزدەسۋلەر، سەمينارلار ۇيىمداستىرىلدى. سونىمەن قاتار پاندەميالىق جاعدايعا ساي تالاپتاردى ساقتاي وتىرىپ كونتسەرتتىك شارا وتكىزىلىپ، چەللەندج جەڭىمپازدارىن باعالى سىيلىقتارمەن ماراپاتتاۋ دا ورىن الدى.
ەلىمىزدەگى تاتۋلىق پەن بىرلىكتى ساقتاۋ قاشاندا ماڭىزدى. ونى جوعارىداعى ايتىلعان جوبالارمەن قۋاتتاپ وتىرۋ دا ءوزىنىڭ جەمىسىن بەرەدى. بۇل دۇرىس قادام. قازاقستان ءۇشىن تاتۋلىق پەن تىنىشتىق ءبىرىنشى ورىندا بولعان ساتتە عانا، دامۋ مەن العا باسۋ ەسىگىمىزدى ءوزى قاعاتىن بولادى.
"ادىرنا" ۇلتتىق پورتالى
