شىمكەنت قالالىق كوزى كورمەيتىن جانە كوزى ءالسىز كورەتىن ازاماتتارعا ارنالعان ارنايى كىتاپحانادا ەرەكشە جوبا قولعا الىندى.
اۋديوفورماتتاعى كىتاپ سانىن كوبەيتۋ جۇمىستارى كارانتين كەزەڭىندەگى ۋاقىتتى ءتيىمدى جانە پايدالى وتكىزۋگە، ەرەكشە قاجەتتىلىكتەرى بار جانداردىڭ كىتاپقا قولجەتىمدىلىگىن ۇلعايتۋعا ارنالعان اۋقىمدى جوبا ارقىلى ىسكە اسادى. وسى كۇنگە دەيىن كىتاپتار «سويلەيتىن كىتاپتار شىعارۋ» بولىمىندە جالعىز كىتاپحاناشى تاراپىنان دىبىستالىنۋىنا بايلانىستى اۋديوكىتاپ قورىنىڭ تولىعۋى باياۋ جۇرەتىن. ەندى، كىتاپحانانىڭ اۋديوكىتاپتار قورى تەاتر ارتىستەرى جانە باسقا مادەنيەت سالاسى قىزمەتكەرلەرى دىبىستاعان كىتاپتارمەن تولىعىپ، سانى ارتۋدا. بۇل جوباعا قاتىسۋشىلار قاتارىندا شىمكەنت قالالىق وپەرا جانە بالەت تەاترىنىڭ ديرەكتورى، قازاقستاننىڭ ەڭبەك سىڭىرگەن ءارتىسى، مەملەكەتتىك سىيلىقتىڭ لاۋرەاتى مايرا مۇحامەدقىزى، شىمكەنت قالالىق ورىس دراما تەاترىنىڭ ديرەكتورى، قر ەڭبەك سىڭىرگەن قايراتكەرى يگور ۆەربيتسكي، شىمكەنت قالالىق ج.شانين اتىنداعى اكادەميالىق قازاق دراما تەاترىنىڭ كوركەمدىك جەتەكشىسى، قر ەڭبەك سىڭىرگەن قايراتكەرى، پروفەسسور، رەجيسسەر بەكبولات قۇرمانعوجاەۆ، شىمكەنت قالالىق ج.شانين اتىنداعى اكادەميالىق قازاق دراما تەاترىنىڭ اكتەرى، قر مادەنيەت قايراتكەرى ەركىن شىمىرقۇلوۆ، شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى حانزادا ەسەنوۆا جانە ت.ب. قىزمەتكەرلەر بار. قازىرگى تاڭدا، ارنايى كىتاپحاناداعى كىتاپ قورى 140376 دانانى قۇرايدى. نەگىزگى كىتاپ قورى بەدەرلى – نۇكتەلى ءارىپتى، جازىق باسپالى، ديسكىدە، ناشار كورەتىندەرگە ارنالعان ءماتىنى ۇلكەيتىلگەن ارىپتەر جازىلعان ادەبيەتتەر مەن مەرزىمدى باسىلىمدار، كىشى قالىپتاعى مۇسىندەر، بەدەرلى – گرافيالىق قۇرالدار. ونىڭ ىشىندە ءدال وسى كىتاپحانادا 2003 جىلدان بەرى دىبىستالىپ كەلە جاتقان اۋديوكىتاپتار سانى 5000-نان استام.
