Shymkent qalalyq kózi kórmeıtin jáne kózi álsiz kóretin azamattarǵa arnalǵan arnaıy kitaphanada erekshe joba qolǵa alyndy.
Aýdıoformattaǵy kitap sanyn kóbeıtý jumystary karantın kezeńindegi ýaqytty tıimdi jáne paıdaly ótkizýge, erekshe qajettilikteri bar jandardyń kitapqa qoljetimdiligin ulǵaıtýǵa arnalǵan aýqymdy joba arqyly iske asady. Osy kúnge deıin kitaptar «Sóıleıtin kitaptar shyǵarý» bóliminde jalǵyz kitaphanashy tarapynan dybystalynýyna baılanysty aýdıokitap qorynyń tolyǵýy baıaý júretin. Endi, kitaphananyń aýdıokitaptar qory teatr ártisteri jáne basqa mádenıet salasy qyzmetkerleri dybystaǵan kitaptarmen tolyǵyp, sany artýda. Bul jobaǵa qatysýshylar qatarynda Shymkent qalalyq opera jáne balet teatrynyń dırektory, Qazaqstannyń eńbek sińirgen ártisi, memlekettik syılyqtyń laýreaty Maıra Muhamedqyzy, Shymkent qalalyq orys drama teatrynyń dırektory, QR eńbek sińirgen qaıratkeri Igor Verbıkıı, Shymkent qalalyq J.Shanın atyndaǵy akademııalyq qazaq drama teatrynyń kórkemdik jetekshisi, QR eńbek sińirgen qaıratkeri, professor, rejısser Bekbolat Qurmanǵojaev, Shymkent qalalyq J.Shanın atyndaǵy akademııalyq qazaq drama teatrynyń akteri, QR mádenıet qaıratkeri Erkin Shymyrqulov, Shymkent qalasynyń mádenıet, tilderdi damytý jáne arhıvter basqarmasynyń basshysy Hanzada Esenova jáne t.b. qyzmetkerler bar. Qazirgi tańda, arnaıy kitaphanadaǵy kitap qory 140376 danany quraıdy. Negizgi kitap qory bederli – núkteli áripti, jazyq baspaly, dıskide, nashar kóretinderge arnalǵan mátini úlkeıtilgen áripter jazylǵan ádebıetter men merzimdi basylymdar, kishi qalyptaǵy músinder, bederli – grafııalyq quraldar. Onyń ishinde dál osy kitaphanada 2003 jyldan beri dybystalyp kele jatqan aýdıokitaptar sany 5000-nan astam.
