قالامىزداعى ەپيدجاعداي كەزىندە شىمكەنت قالالىق №6 ەمحانانىڭ ينفەكتسيونيست-دارىگەرى تەمىراليەۆا دينارا داۋرەنقىزى ىندەتكە قارسى كۇرەستە تاۋلىك بويى كوز ىلمەي جۇمىس ىستەگەن مامانداردىڭ ءبىرى. مەديتسينا سالاسىندا 30 جىلدان بەرى ەڭبەك ەتىپ كەلە جاتقان دارىگەردىڭ ءبىلىمى مەن بىلىگىنە كوڭىلى تولىپ، ريزاشىلىعى مەن العىسىن جاۋدىراتىن تۇرعىندار كوپ.
جوعارى ساناتتى ينفەكتسيونيست دينارا تەمىراليەۆا 1993 جىلى تسەلينوگراد مەديتسينالىق ينستيتۋتىن تامامداعان. جوعارى وقۋ ورنىن ۇزدىك بىتىرگەن ماماندى شىمكەنتتەگى بۇرىنعى تۇرلان ەكسپەديتسياسى اتالعان ەلدىمەكەندەگى سۆا №3 مەكەمەسىنە ينتەرناتۋراسىز بىردەن جۇمىسقا قابىلدايدى. 1993 جىلى وتباسىلىق-دارىگەرلىك امبۋلاتوريادا وتباسىلىق دارىگەر، 2003 جىلى قالالىق جۇقپالى اۋرۋلار اۋرۋحاناسىندا ينفەكتسيونيست بولىپ جۇمىس ىستەگەن. 2012 جىلدان قازىرگى كۇنگە دەيىن قالالىق №6 ەمحانادا دارىگەر-ينفەكتسيونيست بولىپ ەڭبەك ەتىپ كەلەدى.
دينارا داۋرەنقىزى قاۋىپ پەن قاتەرگە تولى جۇقپالى اۋرۋلاردى ەمدەۋ سالاسىندا بالالار مەن ەرەسەكتەردى ەمدەۋدە جانقيارلىقپەن كاسىبي مىندەتىن ادال اتقارىپ جۇرگەن دارىگەر. وتكەن جىلى ىندەت ورشىگەن تۇستا ءوزى ۆيرۋستى جۇقتىرىپ، دەرتى مەڭدەگەنىنە قاراماستان جۇمىسىن ءبىر ساتتە تە توقتاتپادى.
– سول ۋاقىتتارى ەپيدەميولوگيالىق جاعدايعا بايلانىستى ەمحانادا قوسىمشا ءبىر ءبولىم اشىلىپ، وعان 8 ايماق قارادى. ونىڭ ارقايسىسىندا 1600-دەن استام تۇرعىن بولدى. ەكى دارىگەر عانا جۇمىس ىستەدىك. ءبىر وتباسىدان 3-4 ادام كوۆيدكە شالدىعىپ جاتتى. ارينە، قيىن ۋاقىتتار ارتتا قالدى. دەگەنمەن، كوۆيد-19-بەن كۇرەستە ءالى دە قالالىقتار جاۋاپكەرشىلىكتى سەزىنسە، - دەيدى د.داۋرەنقىزى.
انتىنا ادال، تاباندى ەڭبەكقورلىعى، ءوز ىسىنە جاۋاپكەرشىلىگى مول اق حالاتتى ابزال جان كوپتەگەن العىس حاتتاردىڭ يەگەرى.
