الماتىنىڭ بوستاندىق اۋداندىق سوتىندا 26 اقپان كۇنى «مينيسترلىك «رۋحاني جاڭعىرۋ» باعدارلاماسىن ناسيحاتتاۋ ءۇشىن سۋرەتىمدى رۇقساتسىز پايدالاندى» دەگەن فوتوگرافتىڭ ارىزى بويىنشا سوت وتىرىسى جالعاستى. شاعىمدانۋشى فوتوگراف سارسەنبەك قىزايبەكۇلى مەن جاۋاپكەر تاراپ سپورت جانە مادەنيەت مينيسترلىگى جانە الماتى اكىمدىگى اراسىنداعى سوتتىڭ بۇگىن ءتورتىنشى وتىرىسى ءوتتى.
سوت جۋرناليستەردى زالعا كىرگىزگەنىمەن، اكىمدىك پەن مينيسترلىك وكىلدەرى وزدەرىن ۆيدەوعا تۇسىرۋگە تاعى قارسى بولدى. سوت وتىرىسىندا پروكۋرور مينيسترلىك پەن اكىمدىككە «قالاعا ىلىنگەن سۋرەتتەر العاش كىمنەن تارادى؟» دەگەن سۇراق قويدى. ولار «مينيسترلىك سۋرەتتى اشىق دەرەك كوزدەرىنەن الىپ، پرەزيدەنت اكىمشىلىگىنە بەكىتۋ ءۇشىن جىبەرگەنىن» ايتتى. مينيسترلىك وكىلى «سارسەنبەك قىزايبەكۇلىمەن مامىلەگە كەلۋ ءۇشىن ونى بۇعان دەيىن استاناعا شاقىرعانىن»، بىراق ارىزدانۋشى تاراپتىڭ «كەزدەسۋگە 1,5 ميلليون تەڭگە تولەسەڭدەر عانا بارامىن» دەپ جاۋاپ بەرگەنىن ايتتى. الايدا سوتتا فوتوگرافتىڭ ادۆوكاتى ەشقانداي كەپىلسىز كەلىسسوزگە بارۋعا قارسى ەمەسىن جەتكىزدى. جيىرما مينۋتقا سوزىلعان وتىرىستا سوت مينيسترلىككە كەلىسسوز ۋاقىتىن ناقتىلاۋعا ەكى كۇن بەردى.
سارسەنبەك قىزايبەكۇلىنىڭ ايتۋىنشا، جاس بالا مەن قارشىعا بەينەلەنگەن 2014 جىلى تۇسىرگەن سۋرەتى بىلتىر تامىزدان باستاپ قازاقستاننىڭ بىرنەشە ايماعىندا «رۋحاني جاڭعىرۋ» باعدارلاماسىن ۇگىتتەۋدە كورنەكىلىك رەتىندە ىلىنە باستاعان.
بۇعان دەيىنگى سوتتا مينيسترلىك وكىلى سۋرەتتى وزدەرى وڭدەپ جىبەرگەنىمەن، اتقارۋشى ورگاننىڭ (الماتى قالالىق اكىمدىگىن ايتادى – رەد.) ناقتى سول سۋرەتتى الۋ-الماۋعا ەركى بار ەكەنىن ايتقان. الماتى اكىمدىگى دە، مينيسترلىك وكىلى دە سوتتا فوتوگرافپەن «الدىن الا كەلىسىم بولماعانىن، وعان ەشقانداي گونورار تولەنبەگەنىن» مويىنداعان.
azattyq.or
