Almatynyń Bostandyq aýdandyq sotynda 26 aqpan kúni «mınıstrlik «Rýhanı jańǵyrý» baǵdarlamasyn nasıhattaý úshin sýretimdi ruqsatsyz paıdalandy» degen fotograftyń aryzy boıynsha sot otyrysy jalǵasty. Shaǵymdanýshy fotograf Sársenbek Qyzaıbekuly men jaýapker tarap Sport jáne mádenıet mınıstrligi jáne Almaty ákimdigi arasyndaǵy sottyń búgin tórtinshi otyrysy ótti.
Sot jýrnalısterdi zalǵa kirgizgenimen, ákimdik pen mınıstrlik ókilderi ózderin vıdeoǵa túsirýge taǵy qarsy boldy. Sot otyrysynda prokýror mınıstrlik pen ákimdikke «Qalaǵa ilingen sýretter alǵash kimnen tarady?» degen suraq qoıdy. Olar «mınıstrlik sýretti ashyq derek kózderinen alyp, prezıdent ákimshiligine bekitý úshin jibergenin» aıtty. Mınıstrlik ókili «Sársenbek Qyzaıbekulymen mámilege kelý úshin ony buǵan deıin Astanaǵa shaqyrǵanyn», biraq aryzdanýshy taraptyń «kezdesýge 1,5 mıllıon teńge tóleseńder ǵana baramyn» dep jaýap bergenin aıtty. Alaıda sotta fotograftyń advokaty eshqandaı kepilsiz kelissózge barýǵa qarsy emesin jetkizdi. Jıyrma mınýtqa sozylǵan otyrysta sot mınıstrlikke kelissóz ýaqytyn naqtylaýǵa eki kún berdi.
Sársenbek Qyzaıbekulynyń aıtýynsha, jas bala men qarshyǵa beınelengen 2014 jyly túsirgen sýreti byltyr tamyzdan bastap Qazaqstannyń birneshe aımaǵynda «Rýhanı jańǵyrý» baǵdarlamasyn úgitteýde kórnekilik retinde iline bastaǵan.
Buǵan deıingi sotta mınıstrlik ókili sýretti ózderi óńdep jibergenimen, atqarýshy organnyń (Almaty qalalyq ákimdigin aıtady – red.) naqty sol sýretti alý-almaýǵa erki bar ekenin aıtqan. Almaty ákimdigi de, mınıstrlik ókili de sotta fotografpen «aldyn ala kelisim bolmaǵanyn, oǵan eshqandaı gonorar tólenbegenin» moıyndaǵan.
azattyq.or
